ئیمارات هەژماری زەکات بۆ هاووڵاتییانی دروست دەکات

ئاڤا نیوز

 

جیاواز لە هەموو وڵاتانی عەرەبی و هەموو ئەو وڵاتانەی کە پەیڕەوکاری ئاینی ئیسلامن، ئیمارات دەیەوێت لە ڕێگەی دروستکردنی پلاتفۆڕمێکی دیجتاڵییەوە ئاسانکاری بۆ هاووڵاتییانی بکات تاوەکو لە ڕێگەیەوە بتوانن زەکات بدەن.

 

وێنە گەورەکە: زەکات یەکێکە لە ڕوکنەکانی ئاینی ئیسلام و پەیڕەوکارانی ئەو ئاینە لەسەریان سەپێنراوە بەشێک لە سامانەکەیان ببەخشن کاتێک دەگاتە ڕێژەی زیاد لە پێویست، ئەو بەشە زیادەیەش کە لە ماڵ و سامانەکانیان دەری دەکەن دەیدەن بە کەسانێک کە پێویستیان پێیەتی یاخود هەژارن. 

 

چیرۆکی سەرەکی: مانگێک بەر لەهاتنی ڕەمەزانی ساڵی 2025، ئەوقافی ئیمارات پلاتفۆڕمێکی دیجتاڵی خستووەتە بازاڕەوە تاوەکو یارمەتی هاووڵاتییانی و کۆمپانیاکان بدات تاوەکو بەوردی هەژماری خۆیان و بەخشینی زەکاتیان بکەن. 

 

زانیاریی زیاتر: ناوی پلاتفۆرمەکە " زەکاتەکەم خێر و بەرەکەتە بۆ کارەکەم"، ئامانج لە دروستکردنی خزمەتگوزارییەکی تەواو خودکارە و سەرجەم بوارەکانی بازرگانی و پێشەسازی و تایبەت دەگرێتەوە، هەژمارکردنەکەش لەسەر بنەمای شەریعەتی ئیسلام دەبێت، هەر بەکارهێنەرێک دەبێتە خاوەن هەژماری خۆی و سەرجەم مامەڵەکانی بۆ ئەرشیف دەکرێت. 

 

لێدوانی فەرمی: د.عومەر حەبتور دەرعی، سەرۆکی دەستەی گشتی کاروباری ئیسلامی و ئەوقاف لە ئیمارات ڕایگەیاند، دەستپێکردنی کاتی زەکاتدان هاوتەریبە لەگەڵ ستراتیژی کاری  ئیمارات بۆ خزمەتکردنی کۆمەڵگە و هۆشیارکردنەوەی خەڵک سەبارەت بە گرنگی زەکات.