ئاسایشی هەولێر دەست بەسەر 25 کیلۆ ماددەی هۆشبەردا دەگرێت

ئاڤا نیوز

 

دوای بەدواداچوون و کۆکردنەوەی زانیاریی، ئاسایشی هەولێر توانی دەست بگرێت بەسەر زیاتر لە 25 کیلۆ ماددەی هۆشبەر لە جۆری کریستاڵ.

 

وێنە گەورەکە: بەڕێوەبەرایەتیی ئاسایشی هەولێر بەردەوامە لە گەڕان و پشکنین و کۆکردنەوەی زانیاریی لەسەر بازرگانان و بەکارهێنەرانی ماددەی هۆشبەر، لە نوێترین چالاکیشیاندا، بەڕێوەبەراتییە توانی دەست بەسەر زیاتر لە  25 کیلۆ ماددەی هۆشبەر لە جۆری کریستاڵ بگرن کە لەلایەن باندێکی بازرگانیکردن لە ڕێگای کۆمپانیایەکی گواستنەوەوە بە شێوەیەکی تایبەت ئاودیوی شاری هەولێر کراوە.

 

ڕاگەیێنراوەی فەرمی: بەڕێوەبەرایەتیی ئاسایشی هەولێر، ڕایگەیاند: دوای ئەنجامدانی بەدواداچوون و کۆکردنەوەی زانیاریی دەستمان گرت بەسەر بڕی 25 کیلۆ و 5 گرام ماددەی هۆشبەر لە جۆری کریستاڵ، کە لەلایەن باندێکی بازرگانیکردن بە ماددە هۆشبەرەکان، لە ڕێگای کۆمپانیایەکی گواستنەوە بەشێوەیەکی شاراوە لە ناو دوو بۆڕی ئاسن حەشار دراوە و دەربازی شاری هەولێریان کردبوو.

 

زانیاریی زیاتر:  لەبارەی شێوازی شاردنەوەی  ماددەکە ئاسایشی هەولێر دەڵێت، بۆ حەشاردانی ئەم ماددە هۆشبەرە، بە جۆرێک لە دەرمانی قڕکردنی مێرو سەرەوەی ئەو بۆڕیە ئاسنە ڕوپۆش کراوە بۆئەوەی ئاشکرا نەبێت و لەلایەن سەگی(K9)ـوە نەدۆزرێتەوە، هاوکات بە فەرمانی دادوەری لێکۆلینەوەی ئاسایشی هەولێر ڕێکاری یاسایی بەرامبەر ئەو کۆمپانیای گواستنەوەیە گیراوەتەبەر.