ڕێكخراوەكانی ژنان: ساڵی ڕابردوو 48 ژن لە هەرێمی كوردستان كوژراون

ئاڤا نیوز

ڕێكخراوەكانی ژنان، سەبارەت بە بەرزبوونەوەی ئامارەكانی كوشتنی ژنان لە هەرێمی كوردستان هۆشداریی دەدەن و داوا دەكەن ڕێككاری پێویست بگیرێتە بەر.

 

وێنە گەورەكە: ئەمڕۆ لە كۆنفڕانسێكی ڕۆژنامەوانیدا ژمارەیەك لە ڕێكخراوەكانی ژنان و چالاكوانان یاداشتێكی ناڕەزاییان سەبارەت بە هەڵكشانی ئامارەكانی كوشتنی ژنان لە هەرێمی كوردستان خوێندەوە و ئامارێكی نافەرمیشیان لەمبارەیەوە ئاشكرا كرد.

 

لێدوانی فەرمی: شەدە بەشیر، بەڕێوەبەری كارگێڕیی ڕێكخراوی ڕاگەیاندن و ڕووناكبیریی ژنان لە كۆنفڕانسێكی ڕۆژنامەوانیدا ڕایگەیاند: یاداشتەكە ئاراستەی هەریەك لە سەرۆكایەتییەكانی هەرێمی كوردستان و حكومەت و وەزارەتەكانی كار و داد و ناوخۆ دەكەین، پێمانوایە كە سستی هەیە لە بەدواداچوونی دۆسیەكان و كارئاسانیكردن بۆ خۆحەشاردانی تۆمەتباران و شێواندنی بەڵگەكانی تاوانەكانی كوشتنی ژنان، هاوكات زۆربوونی حاڵەتەكانی ناچاركردن بە خۆكوشتن و خۆسووتاندن.

 

زانیاریی زیاتر: بەپێی ناوەڕۆكی یاداشتەكە تەنیا لە ساڵی 2024دا لە هەرێمی كوردستان 48 حاڵەتی كوشتنی ژنان تۆمار كراون و لە سەرەتای ئەمساڵەوە تاوەكو ئەمڕۆ 8-2-2025، هەشت حاڵەتی كوشتنی ژنان تۆمار كراون.