نوێنەری حكومەتی هەرێمی كوردستان لە واشنتن جەخت لە پاراستنی مافی پێكهاتەكان دەكاتەوە

ئاڤا نیوز 

 

وەزیری گواستنەوە و گەیاندنی حكومەتی هەرێمی كوردستان كە وەک نوێنەری پێكهاتەی كریستیانەكانی هەرێمی كوردستان، ئێستا لە واشنتنە، پابەندبوونی حكومەتی هەرێمی كوردستانی لە چەسپاندنی بنەماكانی پێكەوەژیانی ئاشتییانە و زامنكردنی ئازادییە ئایینیەكان لە هەرێمی كوردستاندا دووپات دەكاتەوە.

 

چیرۆكی سەرەكی: ئانۆ جەوهەر، وەزیری گواستنەوە و گەیاندنی هەرێمی کوردستان بەنوێنەرایەتی پێكهاتەكانی هەرێمی كوردستان لەگەڵ ئەنیک ئێم ستۆنهام، سەرۆکی یەکەی ئەفریقا و ڕۆژهەڵاتی ناوەڕاست لە ئۆفیسی ئازادیی ئایینیی نێودەوڵەتی سەر بە وەزارەتی دەرەوەی ئەمەریکا كۆبووەوە و دۆخی پێکهاتە نەتەوەیی و ئایینییەکانیان لە عێراق و هەرێمی کوردستاندا تاوتوێ کرد. 

 

لێدوانی فەرمی: ئانۆ جەوهەر، لە پێگەی فەرمی خۆی ڕایگەیاند، لەم دیدارەدا، جەختم لە داواکارییەکانی پێكهاتەكانی مەسیحی، کلدان، ئاشووری، سریانی و ئەرمەنی وپێکهاتەکانی دیکە کردەوە، کە هاوپەیمانی مەسیحی لە داواکارییەکانیدا بەرجەستەی دەکات.

 

داواكارییەكانی پێكهاتەی مەسیحی چین:

یەكەم: دەبێت میلیشیاکان لە دەشتی نەینەوا بکشێنەوە و دەرفەت بە ڕۆڵەی پێکهاتەکان بدرێت بۆ پاراستنی ناوچەکانیان، لە ڕیزەکانی هێزە ئەمنییە ڕەسمییەکاندا دابمەزرێنرێن.

 

دووەم: هەموارکردنەوەی یاسای هەڵبژاردنی پەرلەمان و حکومەتی خۆجێیی لە سەرتاسەری عێراق، کە سەبارەت بە کۆتای مەسیحییەکان و سنووردارکردنی دەنگدان بۆ کریستیانەکان، واتە تەنیا مەسیحی بۆی هەبێت، دەنگ بدات بە مەسیحی، ئەمەش بۆ دڵنیابوونە لەوەی جارێکی دیکە میلیشیاکان نەتوانن کۆنترۆڵی نوێنەرایەتییەکانی پەرلەمان بکەن، چیتر دەست بەسەر ئیرادەی سیاسی مەسیحییەکاندا نەگرن. 

 

سێیەم: جێبەجێکردنی ئەو ماددە دەستوریانەی کە لە دەستووری هەمیشەیی عێراقدا پەسەند کراون، بەتایبەتی ماددەی 140، بۆ دەستەبەرکردنی چارەی کۆتایی کە گەرەنتی پاراستنی بوونی پێکهاتەکان بکات.