نەتانیاهۆ: سەردانەکەم بۆ واشنتن خاڵی وەرچەرخانە بۆ ئیسرائیل

ئاڤا نیوز

 

بنیامین نەتانیاهۆ، سەرۆکوەزیرانی ئیسرائیل، سەردانەکەی بۆ ئەمریکا و چاوپێکەوتنی لەگەڵ دۆناڵد ترەمپ، سەرۆکی ئەمریکا بە "خاڵێکی وەرچەرخان و مێژوویی" بۆ ئیسرائیل وەسف دەکات.

 

وێنە گەورەکە: ڕۆژی 5-2-2025، دۆناڵد ترەمپ، سەرۆکی ئەمریکا، لە کۆشکی سپی لەگەڵ بنیامین نەتانیاهۆ، سەرۆکوەزیرانی ئیسرائیل کۆبوونەوە، بەم دیدارەش نەتانیاهۆ بووە یەکەم سەرکردەی بیانی لەلایەن ترەمپەوە پێشوازی لێبکرێت لە دوای دەستبەکاربوونی.

 

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل ڕایگەیاند: "ئەم سەردانە و گفتوگۆکانمان لەگەڵ سەرۆکی ئەمریکا، دەستکەوتی زۆرباش و سەرکەوتوو بەدوای خۆیدا دەهێنێت کە ئاسایشی ئیسرائیل بۆ نەوەکانی داهاتوو مسۆگەر دەکات".

نەتانیاهۆ ڕاشیگەیاندووە: "ترەمپ هاوڕایە لە نەهێشتنی حەماس، گەڕاندنەوەی هەموو سەربازە ڕفێنراوەکان، دڵنیابوون لەوەی کە غەززە مەترسی لەسەر ئیسرائیل دروست ناکات".

 

باکگراوند: دوای کۆبوونەوەکەیان لەگەڵ نەتانیاهۆ، لە کۆنگرەیەکی ڕۆژنامەوانیدا دۆناڵد ترەمپ، سەرۆکی ئەمریکا ڕایگەیاند، "دەستبەسەر کەرتی غەززەدا دەگرین، هەوڵی بوژاندنەوەی کەرتی ئابووری و بوونیات نانەوەی ئەو کەرتە دەدەین، ئەمەش کاردانەوەی جیهانی بەدوای خۆیدا هێنا و تەنیا ئیسرائیل پشتگیری ئەم پێشنیازەی ترەمپی کرد".