BP و نەوتی عێراق "بەرنامەی هاوبەش" بۆ پەرەپێدانی کێڵگەکانی کەرکووک ڕادەگەیێنن

ئاڤا نیوز

 

بریکاری وەزارەتی نەوتی عێراق دەڵێت، گفتوگۆ لەگەڵ کۆمپانیای بریتش پترۆڵیۆم (BP)ـی بەریتانیا بۆ گەشەپێدانی کێڵگە نەوتییەکانی کەرکووک بەردەوامە و هەردوولا کار لەسەر بەرنامەیەکی هاوبەش دەکەن، لە ماوەیەکی نزیکیشدا کارکردن لە کێڵگەکان دەستپێدەکات.

 

چیرۆکی سەرەکی: سەرەڕای نیگەرانییەکانی هەرێمی کوردستان، بەڵام 15-01-2025 لە چوارچێوەی سەردانەکەی سەرۆکوەزیرانی عێراق بۆ لەندەن، وەزارەتی نەوتی عێراق و کۆمپانیای بریتش پترۆڵیۆم (BP) یاداشتێکی لێکتێگەیشتنیان بۆ نۆژەنکردنەوە و پەرەپێدانی کێڵگە نەوتییەکانی کەرکووک واژۆکرد.

 

لێدوانی فەرمی: عەلی معارج، بریکاری وەزارەتی نەوتی فیدراڵ بۆ ئاژانسی فەرمی عێراق:

 

- هەوڵەکانمان بۆ گەشەپێدانی کێڵگە نەوتییەکان و سوود وەرگرتن لەو غازەی لەکاتی بەرهەمهێنانی نەوتدا دەسوتێت بەردەوامە، تا بگەینە ئاستی خۆبژێویی لە غاز و بەرهەمە نەوتییەکان

 

- بەرنامەی هاوبەشمان هەیە لەگەڵ کۆمپانیای کۆمپانیای بریتش پترۆڵیۆم (BP) بۆ وەبەرهێنان لە کێڵگە نەوتییەکانی کەرکووک، ئێستاش گفتوگۆ هونەریی و ڕێکارییەکان بۆ جێبەجێکردنی لێکتێگەیشتنە هاوبەشەکەمان بەردەوامە و لەماوەیەکی نزیکدا هەردوولا لەسەر وردەکارییەکان دەگەیەنە ڕێککەوتن.

 

-گرێبەستی هاوبەشی لە قازانج، بۆ ئێستا گونجاوترین جۆری پێکەوەکارکردنە چونکە قازانجی هەردوولای تێدایە، کۆمپانیا بەریتانییەکەش بەو ئاڕاستەیە هەنگاو دەنێت.

 

-ئێستا 60-65%ی ئەو غازەی لەکاتی بەرهەمهێنانی نەوتدا دەسوتێت، وەبەرهێنانی تێدا دەکرێت و بۆ وزە گۆڕدراوە، بڕیاریشە لە پێنج ساڵی داهاتوودا ئاستی سووتانی غاز بگەیێنرێتە 0%.