گرووپە چەكدارەكان "چالاكییەكانیان" لە دژی ئیسرائیل زیاتر دەكەن

ئاڤا دیجیتاڵ

 

شەڕ و پێكدادانەكان لە كەرتی غەززە 100ڕۆژی تێپەڕاند. بزووتنەوەی "حەماس" دەڵێت، دەیانەوێت لەگەڵ گرووپە چەكدارەكانی دیكەدا چالاكیی "زیاتر دژی ئیسرائیل بکەن".

 

چیرۆكە سەرەكییەكە: تاوەکو دێت شەڕ و ئاڵۆزییەكان لە کەرتی غەززو زیاتر دەبن. زیاتر لە 22 هەزار كەس كوژراون و نزیكەی دوو ملیۆن هاووڵاتیش ئاوارەبوونە. ئۆپەراسیۆنەكانی ئیسرائیل لە كەرتەكە بەردەوامە و گرووپە چەكدارەكانیش دەڵێن: "رووبەڕووی ئیسرائیل دەبینەوە و خۆمان بەدەست نادەین".

 

ئەوەی ئێستا ڕوودەدات: گوتەبێژی بزووتنەوەی حەماس دەڵێت: "لەگەڵ چەند گرووپێكی دیكە لە چەند رێككەوتنێكی گەورەدان بۆ ئەوەی فشار و هێرشەكانیان بۆ سەر سووپای ئیسرائیل زیاتر بكەن، لە چەند گۆشەیەكی جیاوازەوە، كە پەیوەستە بە هێرشی مووشەكی و پەلاماردانی سووپا.

 

بۆچوونی لایەنی بەرامبەر: حەماس دەڵێت: "بەهۆی هێرش و بۆردوومانە بەردەوامەكانی سوپای ئیسرائیلەوە، دەیان دیل كوژراون و چەندی دیكەش ژیانیان لە مەترسیدایە، ئەوەش وادەكات دۆخەكە ئاڵۆزتر بێت، لە چەند هەفتەی ڕابردوودا، چارەنووسی بەشێکی زۆر لە دەستگیرکراوەکانی ئیسرائیل نادیارە و ڕەنگە ئەو دەستگیرکراوانەی کە ماونەتەوە، کوژراوبن یان ژیانیان لە مەترسیدابێت لە ئەنجامی بۆردوومانەکانی ئیسرائیل".

 

لێدوانە فەرمییەكان: دانیال هاگاری، گوتەبێژی سووپای ئیسرائیل ڕایگەیاندووە، گەڕانەوەی دەستگیرکراوانی ئیسرائیل لە ناوخۆی کەرتی غەززەوە کاتی دەوێت. گوتیشی: "مامەڵە لەگەڵ هەموو دەرفەت و ئامرازەکانی بەردەست دەکات بۆ گەڕاندنەوەی دەستگیرکراوەکانی لە نێو کەرتی غەززەوە".

 

ئەوەی پێشبینی دەكرێت: پێشبینی دەكرێت ئیسرائیل لە هیچ شوێنێكی كەرتی غەززە نەكشێتەوە، گرووپە چەكدارەكانیش چالاكیی زیاتر دژی ئیسرائیل دەكەن و پەیتا پەیتا مووشەك دەگرنە سووپا.

 

باکگراوند: سەد رۆژ بەسەر شەڕی نێوان سوپای ئیسرائیل و گرووپە چەكدارەكان لە كەرتی غەززە تێدەپەڕێت، زیاتر لە 23 هەزار كەس كوژراون و نزیكەی دوو ملیۆن هاووڵاتیش ئاوارەبوونە.