كۆمپانیاكانی دلیڤەری پابەند دەكرێن بەرپرسیاریەتیی سەرپێچیی ماتۆڕسوارەكانیان

ئاڤا نیوز

 

وەزارەتی ناوخۆ ئاگاداری کۆمپانیاکانی دلێڤەری دەکاتەوە، بەرپرسیاریەتی ئەو ماتۆرسوارانە هەڵبگرن كە خواردن بۆ هاووڵاتیان دەگوازنەوە. 

چیرۆکی سەرەکی: وەزارەتی ناوخۆی حکومەتی هەرێمی کوردستان، چەند بڕیارێکی سەبارەت بە کۆمپانیاکانی گەیاندنی خواردن و کارکردنی ماتۆڕسوارەکان دەرکرد.

بڕیارەکانی وەزارەتی ناوخۆ سەبارەت کارکردنی ماتۆڕسوارەکان:-

یەكەم: پێویستە ماتۆرسوارانی گەیاندنی خواردن، ماتۆرەکانیان لە بەڕێوەبەرایەتیی هاتووچۆی هەولێر تۆمار بکەن و مۆڵەتی ماتۆرسواری دەربهێنن، هاوکات هەر ماتۆرسوارێک مەرجی سەلامەتی نەبێت، نابێت کۆمپانیا دەرفەتی کاری پێبدات. بە پێچەوانەوە کۆمپانیا بەرپرسیار دەبێت، سەرپێچی سزا داراییەکانی ماتۆری نەناسراویش دەکەوێتە ئەستۆی کۆمپانیا.

دووەم: ئەو ماتۆرانەی لە ماوەی ڕابردوو بێ تابلۆ و تۆمارکردن لەلای كۆمپانیاكانی دلیڤەری کاریان کردووە و سەرپێچی یاساکانی هاتووچۆیان کردووە و سزای داراییان هاتۆتە سەر، بە ناسینەوەی لۆگۆی تایبەت بە کۆمپانیاکان، بەرپرسیارەتی کەمتەرخەمی دەکەوێتە ئەستۆی کۆمپانیاکان. دەكرێت كۆمپانیاكان بەشێوەی قیست سزای دارایی سەرپێچییەكانی ماتۆرسوارەكانیان بدەن لەماوەیەک كە درێژتر نەبێت لە 31- 12- 2025، سوودمەندیش دەبن لە بڕیاری ڕێژەی داشكاندنی پێبژاردنەكان كە لە بەڕێوەبەرایەتی هاتووچۆ دەرچووە، بە پێچەوانەوە لە دوای ئەو ڕێکكەوتە واتە لە ساڵی نوێی 2026، کۆمپانیاتان ڕووبەووی لێپرسینەوە یاسایی و ڕاگرتنی کارەکان دەکرێت.

سێیەم: كۆمپانیاكانتان پێویستە پابەند بن بە ڕەخساندنی دەرفەتی كار بۆ هاووڵاتیانی هەرێمی كوردستان و پێشینەیی بدرێت بە هاووڵاتیان بە گوێرەی بڕیار 172ـی ئەنجوومەنی وەزیران، هەر بیانییەك لەلاتان كاری گەیاندنی خواردن بكات پێویستە نشینگەی (بەسەرنەچوو) هەرێمی كوردستان هەبێت و مۆڵەتی ماتۆرسواری هەبێت، هەروەها پێویستە ئەوانەی خواردن دەگوزانەوە بۆ ماڵان لەلایەن ئەمنی و پاشخانی تاوان بەڵگەنامەی بێتاوانی پێشكەشتان بكەن و لەناو دۆسیەیان پارێزراو بێت، بەپێچەوانەوە كۆمپانیا بەرپرسیاریەتیی یاسایی هەڵدەگرێت.

چوارەم: بۆ ڕەچاوكردنی میزاجی گشتیی هاووڵاتیان و پارێزگاریكردن لە ژینگە، پێویستە هەوڵ بدرێت بۆ گەیاندنی خواردنی دلیڤەری بۆ گەڕەكەكانی ناوشار، ماتۆڕی كارەبایی و بێ دەنگ بەكاربهێندرێت و بەگشتیش ماتۆڕەكتن پێویستە لەڕووی دەنگەوە بێزاركەر نەبێ.

پێنجەم: بۆ سەلامەتی گیانی خۆیان، پێویستە ماتۆڕسكیلەكان پابەندبن بە لەسەركردنی كڵاو و پۆشینی جلوبەرگی تایبەت، لەبەر بارودۆخی ئەمنی، هەر كۆمپانیایەك پێویستە جلوبەرگی تایبەت بەخۆی هەبێت و تەنیا ئەو ماتۆرسكیلانەی كار لەگەڵ ئەو كۆمپانیایە دەكەن دەستیان بگاتە كڕینی ئەو جلوبەرگە و باجی تایبەت بەخۆیان لە یەخەیان بدەن كە ناوی سیانی و كۆدی كاركردنی كۆمپانیای تیا نووسرابێت، هەروەها دەبێت ماتۆرسكیلان پابەندی یاسا و ڕێساكانی لێخوڕینی سەلامەتی و ڕێگاوبان بن.