شاندی باڵای هەرێمى كوردستان سەردانی وەزارەتی دەرەوەی ئیتاڵيا دەكات

ئاڤا نیوز

 

شاندێكی باڵای حكومەتی هەرێمی كوردستان سەردانی وەزارەتی دەرەوەی ئیتاڵیایان كرد و بەڵێنی هاتنی ژمارەیەكی زیاتری وەبەرهێنەرانی ئەو وڵاتەیان لە بەرپرسانی ئیتاڵیا وەرگرت.

 

وێنە گەورەكە: له‌ دووه‌مين ڕۆژى کۆڕبەندی ئابووريی هەرێمی کوردستان - ئیتاڵیا، شاندی حکومەتی هەرێمی کوردستان بە سەرۆکایەتيی سەفین دزەیی، بەرپرسی فەرمانگەی پەیوەندییەکانی دەرەوە و بەیاوەری بێگەرد تاڵەبانی، وەزیری کشتوکاڵ و سه‌رچاوه‌كانى ئاو و محه‌مه‌د شوکری، سەرۆکی دەستەی وەبەرهێنان، سەردانی کۆنفیدراسیۆنی گشتيی پیشەسازيی ئیتاڵیایان کرد و لەلایەن ماورۆ باتۆکی، بەڕێوه‌بەری گشتيی بەرەوپێشبردنی سیستەمی ئیتاڵیا لە وەزارەتی دەرەوەی ئه‌و وڵاته‌ و هاوکاريی نێودەوڵەتی و مارکۆ فالێساتی، ڕاوێژکاری جێبەجێکاری سیاسەتی بازرگانی و هاوکاريی نێودەوڵەتی، لە کۆنفیدراسیۆنی پیشەسازيی ئیتاڵیا پێشوازیيان لێ کرا.

 

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان بڵاویكردووەتەوە، شاندی هەرێمی كوردستان لەلایەن جۆرجیۆ سیلی، جێگری وەزیری دەرەوەى ئيتاڵيا پێشوازیيان لێ کرا و پێشهاتە سیاسی و سەربازیيەکانی ڕۆژهەڵاتی ناوەڕاست تاووتوێ کران، خاڵێکی ديكه‌ى گفتوگۆکان کاریگەريی ئیدارەی نوێی ئه‌مه‌ريكا بوو لەسەر ناوچەکە بە گشتی.

 

لەگۆشەیەكی دیكەوە: لەمیانی كۆبوونەوەكاندا، وەبەرهێنەرانی كوردستان و ئیتاڵیا بۆچوونی خۆیان ئاڵوگۆڕ كرد بەمەبەستی پەرەپێدانی وەبەرهێنانی ئیتاڵیا لە هەرێمی كوردستان و شاندە كوردستانییەكە، بەڵێنی ئەوەیان وەرگرت، لە ئایيندەدا وەبەرهێنەرانی ئیتاڵی دێنه‌ هەرێمی کوردستان.

 

لایەنە ئەرێنییەكان: بەرپرسانی وەزارەتی دەرەوەی ئیتاڵیا پشتگیريی سەربازی و ئابووريی خۆیان بۆ هه‌رێمى كوردستان و مانەوەیان لە ناوچەكە دووپات كرده‌وه‌ و جگە لە ڕاوێژی سەربازی لەبوارەكانی دیكەش هەماهەنگ دەبن.