ئاژانسی وزەی ئەتۆم: کات بۆ ڕێککەوتن لەسەر بەرنامە ئەتۆمییەکەی ئێران تەواو دەبێت

 

ئاڤا نیوز

رافایڵ گرۆسی بەرپرسی ئاژانسی وزەی ئەتۆمیی نەتەوە یەکگرتووەکان ڕایگەیاند، کات بۆ ڕێککەوتن لەسەر کۆنتڕۆڵکردنی بەرنامە ئەتۆمییەکەی ئێران تەواو دەبێت، تارانیش بەردەوامە لە خێراکردنی پڕۆسەی پیتاندنی یۆرانیۆم بۆ ئەوەی چەکی ئەتۆم بەدەستبهێنێت.

وێنە گەورەکە: لەکاتێکدا ئێران ئامادەیی خۆی بۆ دەستپێکردنەوەی دانوستانەکان لەسەر بەرنامە ئەتۆمییەکەی لەگەڵ وڵاتانی ڕۆژئاوا نیشانداوە، بەڵام ئەو وڵاتە بەردەوامە لە پەرەپێدانی بەرنامە ئەتۆمییەکەی، لەم نێوەندەشدا ئێران ترسی لە هەوڵەکانی ئیسرائیل بۆ کردنە ئامانجی بنکە ئەتۆمییەکانی هەیە.

لێدوانی فەرمی: رافایڵ گرۆسی بەرپرسی ئاژانسی وزەی ئەتۆمیی نەتەوە یەکگرتووەکان ڕایگەیاند:

-    ئێران بەردەوامە لە پیتاندنی یۆرانیۆم و پڕۆسەکەی خێرا کردووە، لەکاتێکدا کاتی ڕێککەوتن لەسەر بەرنامە ئەتۆمییەکەی ئێران تەواو دەبێت.

-    تائێستا لەسەر پرسی چەکی ئەتۆمی ئێران گفتوگۆم لەگەڵ ئیدارەی دۆناڵد ترەمپ سەرۆکی ئەمریکا نەکردووە.

ئەوەی ئێستا ڕوودەدات: بەپێی سەرچاوە هەواڵگرییەکانی ئەمریکا، ئێران سەرقاڵی پەرەپێدانی کڵاوەی ئەتۆمییە بۆ ئەو موشەکانەی دەتوانن مەودای زیاتر لە سێ هەزار کیلۆمەتر ببڕن و بگەنە وڵاتانی ئەوروپا.