سەدان گوندی هەرێمی کوردستان بەهۆی پەکەکەوە چۆڵکراون

ئاڤا نیوز

 

بەهۆی بەردەوامی شەڕ و ململانێی نێوان پەكەكە و توركیا و بوونی بنكە و بارەگاكانی چەكدارانی پەكەكە لە ناوچە سنوورییەكانی هەرێمی كوردستان سەدان گوند چۆڵكراون.

 

وێنە گەورەكە: زیاتر لە 32 ساڵە شەڕ و ململانێی نێوان پەكەكە و توركیا، زەرەر و زیانێكی زۆری لە هەرێمی كوردستان داوە، جگە لە شەهیدبوون و برینداربوونی سەدان هاووڵاتی، سەدان گوند چۆڵكراون و هەزاران دۆنم زەویی كشتوكاڵیش سووتاون و وێران كراون. 

 

زانیاریی بەدەستهاتوو: بەپشت بەستن بە ئامارە تۆماركراوەكانی تۆڕی هه‌ماهه‌نگی رێكخراوه‌كان لە پارێزگای دهۆک، تا ئێستا نزیكەی 800 گوند چۆڵ كراون، یاخود بەهۆی هەڕەشە و مەترسیی هەبوونی چەكدارانی پەكەكەوە گوندنشینان ناتوانن بگەڕێنەوە ماڵەکانیان.

 

ژمارەكان وادەڵێن: ئامار و ژمارەی ئەو ناوچانەی کە بەهۆی شەڕی پەکەکەوە چۆڵکراون:-

 

ده‌ڤه‌ری‌ سیدەکان: كۆی گشتیی ڕووبه‌ره‌كه‌ی هەزار و 617 كیلۆمه‌تر چوارگۆشەیه‌، 647 كیلۆمه‌تر چوارگۆشه‌ی کە دەکاته‌ 46%ـی خاکی ناوچەكە لەژێر ھەڕەشەی پەکەکە و بۆردومانی تورکیا دایە و 118 گوندی ئەو ناوچەیە چۆڵکراون و زیاتر لە 6 هەزار دۆنم دارستان و پاوان سووتاون.

 

قەزای چۆمان: لەکۆی 116 گوند، نزیکەی 45 گوند بەهۆی مەترسی چەکدارانی پەکەکە چۆڵكراون و گوندنشینان ناتوانن بگەڕێنەوە گوندەکانیان.

 

ناحیەی وەرتێ سەر بە قەزای ڕواندز: 5 گوند بەهۆی پەکەکەوە مەترسی هەیە و خەڵک ناتوانن بە ئاسوودەیی ژیان بەسەربەرن.

 

ده‌ڤه‌ری پشده‌ر: له‌ ماوەی 14 ساڵی ڕابردوو به‌هۆی بوونی چەکدارانی پەکەکە بە تایبەتی له‌ بناری قەندیل، 40 بۆ 45 گوند چۆڵكراون كه‌ به‌شی زۆریان له‌ دوای ڕاپه‌ڕین ئاوه‌دانكرانه‌وه‌، زۆربەی گوندنشینانیش مەرومەڵات و ئاژەڵەکانیان فرۆشتووە.

 

سنووری پارێزگای دهۆک: تائێستا 591 گوند چۆڵكراون كه‌ ده‌گاته‌ ڕێژه‌ی 42%ـی كۆی گونده‌كانی پارێزگاكە.

 

کاریگەری و لێکەوتەکان: بەگشتیی زیانەكانی كەرتی كشتوكاڵ و ئاژەڵداری و گەشتیاری و ئابووریی ناوچە سنوورییەكانی هەرێمی كوردستان بەهۆی بوونی بنكە و بارەگاكانی پەكەكە بە زیاتر لە 100 ملیار دینار مەزەندە دەكرێت، زیانەكانیش لە ناوچەكانی ئامێدی، زاخۆ، بەرواری باڵا، سیدەكان و بناری قەندیل بەراورد بە ناوچەكانی دیكە مەزندەی زیاتری بۆ دەکرێت.