بەهۆی شەڕی تورکیا و پەکەکە 720 هاونیشتمانی هەرێمی کوردستان بوونەتە قوربانی

ئاڤا نیوز

 

لە ساڵی 1991ـەوە تا ئێستا بەهۆی هێرشەکانی سوپای تورکیا لە باشووری کوردستان و شەڕەکانیان لەگەڵ گەریلاکانی پەکەکە، 720 هاونیشتمانی باشووری کوردستان بوونەتە قوربانی. ئەمەش بەپێی ئاماری ڕێکخراوێکی ئەمریکی.

 

وێنە گەورەکە: یەکەم ئۆپەراسیۆنی تورکیا بۆ سەر گەریلاکانی پەکەکە لە باشووری کوردستان دوو مانگ دوای ڕاپەڕینی ئاداری 1991 بوو، تورکیا ناوی لێنابوو  "ئۆپەراسیۆنی گسک لێدان".

 

لێدوانی فەرمی: کامەران مەلا عوسمان، ئەندامی تیمی کوردستانی عێراقی ڕێکخراوی CPTـی ئەمریکی بە ئاڤا میدیای ڕاگەیاند، "بەهۆی لەشکرکێشی سوپای تورکیا لە دوای ساڵی 1991ـەوە تا ئێستا 720 هاونیشتمانی بوونەتە قوربانی، 353 شەهید و 367 بریندار بوون".

 

سەبارەت بە ئاماری چۆڵبوونی گوندەکان، ئەو ئەندامەی ڕێکخراوی CPTـی ئەمریکی دەڵێت: 183 گوند بەتەواوی چۆڵ بوون، 602 گوند مەترسی چۆڵبوونیان لەسەرە و نزیکەی 400 گوندیش ئاوەدان نەکراونەتەوە.

 

ئەوەی پێویستە بیزانیت: پرسی دەستپێکردنەوەی ئاشتی لە تورکیا هاتووەتەوە بەرباس، لەماوەی ڕابردوو چەند جارێکی دیکە شەڕ وەستاوە، درێژترین ماوە لەنێوان ساڵی 2000 تا ساڵی 2007 بوو.