520 کیلۆمەتر دووجا زەوی هەرێمی کوردستان لە مین پاککراوەتەوە

ئاڤا نیوز

 

کار بۆ پاککردنەوەی تەواوی خاکی هەرێمی کوردستان لە مین دەکرێت، دەزگای مینیش لەمبارەیەوە دەڵێت، "پێویستمان بە زیادکردنی بودجەیە بۆ ئەوەی هەنگاوەکانمان خێراتر بکەین".

 

وێنە گەورەکە: بەشێکی زۆر لە خاکی هەرێمی کوردستان، لەلایەن ڕژێمی پێشووی عێراق و بەهۆی شەڕی ئەو ڕژێمە لەگەڵ ئێران مینڕێژ کراوە، بەوهۆیەوە سەدان هاونیشتمانی گیانیان لەدەستداوە یان برینداربوون و بەشێکی جەستەیان لەدەست داوە. هاوکات ئەو ناوچانەی زۆرترین مینیان تێدا چێنراوە، پێنجوێن، باڵەکایەتی و چۆمانن.

 

لێدوانی فەرمی: ئاکار خالید، بەرپرسی ڕاگەیاندنی بەڕێوەبەرایەتیی دەزگای مین بە ئاڤا میدیای ڕاگەیاند: لە ساڵی 2020 گرێبەستی ئەو ئۆتۆمبێلانەی تیمەکانی دەگواستینەوە هەڵوەشایەوە، بۆیە ناچار بووین زۆرجار 10 کیلۆمەتر بە پێ بڕۆین تا بە کێڵگەکانی مین بگەین، ئەمەش هەنگاوەکانی پاککردنەوەی و هەڵگرتنەوەی مینی لە ناوچەکان خاوکردەوە.

 

لەلایەکی دیکەوە: دەزگای مین داوا لە حکومەتی هەرێمی کوردستان دەکات، بودجەکەی بۆ زیاد بکات، بۆ ئەوەی هەنگاوەکانی پاککردنەوەی کێڵگەکانی مین خێراتر بکرێت، ئێستا بەهۆی کەمی تیم و هۆیەکانی گواستنەوە و ئامێرەکانەوە کارەکان سستن.

 

ژمارەکان وادەڵێن: 776 کیلۆمەتر دووجا لە ڕووبەری هەرێمی کوردستان مینڕێژ کرابوو، لەو ژمارەیەش 520 کیلۆمەتر دووجا پاککراوەتەوە و 256 کیلۆمەتر دووجا ماوە، کە دەکاتە نزیکەی سێ هەزار کێڵگەی مین.

 

زانیاریی زیاتر: زۆرترین جۆری ئەو مینەی لە خاکی هەرێمی کوردستان چێنراوە، مینی دژە کەسین و زیاتر لە ناوچە شاخاوییەکان چێنراون.

 

زانیاریی بەدەستهاتوو: لە ساڵی 1991 تاوەکو ئێستا نزیکەی 14 هەزار کەس بەهۆی مینەوە گیانیان لەدەست داوە.

 

باکگراوند: بەگوێرەی ڕێککەوتننامەیەکی نێودەوڵەتی کە عێراق واژۆی لەسەر کردووە، بازرگانیکردن بە مین و کۆگاکردنی قەدەغەیە، هەروەها دەبێت تاوەکو ساڵی 2028 خاکی عێراق و هەرێمی کوردستان لە مین و تەقەمەنی پاک بکرێتەوە.