موقتەدا سەدر داوای سەرکردەکانی گرووپی "قوربان" لە ئێران دەکات

ئاڤا نیوز

 

موقتەدا سەدر، ڕێبەری باڵای ڕەوتی نیشتمانیی شیعی داوا لە ئێران دەکات، سەرکردەکانی گرووپی "قوربانییەکان" ڕادەستی حکومەتی عێراق یان " حەوزەی شیعی " بکات، بۆ ئەوەی لێپرسینەوەیان لەگەڵ بکرێت و بەزووترین کات سزا بدرێن.

 

چیرۆکی سەرەکی: گرووپی قوربانییەکان کە 'عەلاهییەکان'ـیشیان پێدەگوترێت لە ناوەڕاست و باشووری عێراق چالاکن، شوێنکەوتووانی ئەم گرووپە بانگەشەی ئەوە دەکەن، ئیمام عەلی کوڕی ئەبی تاڵیب خوداوەندێکە، لەنێو ئەندامەکانیاندا تیروپشک دەکەن و هەرکەسێک ناوی دەربچێت دەبێت خۆی بکاتە قوربانی بۆ ئیمام عەلی.

 

لێدوانی فەرمی: موقتەدا سەدر، ڕێبەری باڵای ڕەوتی نیشتمانیی شیعی لەبەیاننامەیەکدا ڕایگەیاند: سەرکردەکانی ئەم گرووپە نامۆیە لە دەرەوەی وڵاتەوە پاڵپشتی دەکرێن، بۆیە داوا لە ئێران دەکەین بەزووترین کات ئەو سەرکردانەی گاڵتە بە عەقڵی لاوەکانمان دەکەن و لە ئێران نیشتەجێن ،ڕادەستی حکومەتی عێراق یان "حەوزەی" نەجەف بکرێن.

 

زانیاریی زیاتر: موقتەدا سەدر بە پێویستی دەزانێت، "هەموو تاکێکی کۆمەڵگا ئەم گرووپە شەرمەزار بکەن و بەهیچ شێوەیەک مامەڵەیان لەگەڵ نەکەن، تەنانەت لەڕووی خواردن و خواردنەوەش بایکۆتیان بکەن." 

 

ئەوەی پێویستە بیزانیت: بە گوتەی سەدر، "ئەوانە کۆمەڵێک کەسی نەزانن و پێچه‌وانه‌ی شه‌ریعه‌ت و دژی خودای گەورە ڕه‌فتار دەکەن."