زانیاریی نەبیستراو لەسەر شوێنی نیشتەجێبوونی بەشار ئەسەد لە ڕووسیا ئاشکرا دەبێت

ئاڤا نیوز

 

ڕۆژنامەنووسێکی ڕۆژنامەی (ئیسرائیل هیوم) کە لە مۆسکۆ نیشتەجێییە، بەدواداچوونێکی وردی کردووە بۆ ژیانی بەشار ئەسەد لە مۆسکۆ و کۆمەڵێک زانیاریی هەستیاری لەسەر ژیانی سەرۆکە هەڵاتووەکەی سووریا دەستکەوتووە.

 

زانیاریی بەدەستهاتوو: بەپێی ڕاپۆرتی ڕۆژنامەنووسەکە، بەشار ئەسەد و خانەوادەکەی لە ناوازەترین ناوچەی مۆسکۆ نیشتەجێن کە پێی دەوترێت (مۆسکۆ سیتی) و لە کۆمەڵێک تاوەری سەرنجڕاکێش پێکدێن و وەک یەکێک لە شوێنە ناوازەکانی مۆسکۆ ناوی دێت.

 

لێدوانی تایبەت: ڕۆژنامەنووسەکە لەگەڵ بەڕێوەبەری کۆمپانیایەکی عەقارات قسەی کردووە، ئەو کەسە لە کاتی دروستکردنی تاوەرەکانی (مۆسکۆ سیتی) کاری کڕین و فرۆشتنی ئەو یەکانەی کردووە، دەڵێت: ڕۆژێک پلە باڵایەکی نزیکی ماڵی ئەسەد هاتەلام و سەرسامی خۆی دەربڕی بەو تاوەرانە، بۆیە 19 یەکەی نیشتەجێبوونیان لە مۆسکۆ سیتی کڕیی، بەشێکیان لەسەر بنەماڵەی ئەسەد تاپۆ کراون و بەشێکی دیکەیان لەسەر کۆمپانیاکانی بنەماڵەی ئەسەد.

 

زانیاریی زیاتر: خاوەنی ئەو کۆمپانیایەی عەقارات دەڵێت: لەو کاتە نرخی هەر شوقەیەکی ئاسایی لەو تاوەرانە دوو ملیۆن دۆلار بووە، بەڵام بنەماڵەی ئەسەد باشترین کوالێتی شوقەیان هەڵبژاردووە.

 

بەدواداچوونی تایبەت: ئەو ڕۆژنامەنووسە لە سەرچاوەیەکی ئەمنی ڕووسیا زانیاریی دەستکەوتووە، نیوەی دەزگای ئەمنی ڕووسیا لە مۆسکۆ وەک پارێزگاری لە شوێن و ئەمنیەتی بەشار ئەسەد ڕاسپێردراون. واتا هیچ کەسێک ناتوانێت نزیکی شوێنی نیشتەجێبوونی بنەماڵەی ئەسەد ببێتەوە، هیچ ڕۆژنامەنوسێکی ڕووسی و میدیایەکی ڕووسیش بۆی نییە زانیاری لەبارەی شوێنی ژیانی بنەماڵەی ئەسەد بڵاوبکاتەوە. ئەمەش تەنیا لەبەر ئەوەی ئەگەر ئاشکرا بێت بەشار ئەسەد و بنەماڵەکەی لەو ژیانە شاهانەیە دەژین، بنکەکانی ڕووسیا لە سووریا دەکەونە مەترسییەوە.

 

ئەوەی پێویستە بیزانیت: بەدواداچوونی ئەو ڕۆژنامەنووسە دەریدەخات، لە ماوەی ساڵانی ڕابردوودا بەشار ئەسەد 250 ملیۆن دۆلاری بە 20 کاروانی فڕۆکە گواستووەتەوە مۆسکۆ، ئەمەش وەک ئامادەکارییەک بووە بۆ ئەوەی کاتێک ژیانی سیاسیی کۆتایی هات، بۆ خۆی خەریکی کاری بازرگانی بێت.

 

ئەمەش بزانە: لە ڕاپۆرتەکەی ڕۆژنامەی ئیسرائیل هیوم ئەوە هاتووە، لەناو ڕووسیا دەستەواژەیەک هەیە زۆرباوە، ڕووسەکان خۆیان دەڵێن، ڕووسیا بووەتە (یانەی دیکتاتۆرە پەراوێزخراوەکان) چونکە ئێستا بەشار ئەسەد لەوێ دەژیت، ڤيكتۆر يانوكوفيتش، سەرۆکی پێشووی ئۆکراینا و چەندین سەرۆکی دیکەش لە ڕووسیا دەژین و لێیان پاڵداوەتەوە.