لە ئەزهەری کوردستان 53 فەقێ مۆڵەتی مەلایەتییان وەرگرت

ئاڤا نیوز

ئەمڕۆ لە خانەقای بیارە 53 فەقێ مۆڵەتی مەلایەتی وەرگرت، ڕێوڕەسمێکی گەورە ساز کرا و میوانی زۆر ڕوویان لە بیارە کردووە.

زانیاریی پەیامنێر: ئاراس ڕەفیق، پەیامنێری ئاڤا لە هەڵەبجە لەبارەی ڕێوڕەسمەکە دەڵێت:

- فەقێکان خەڵکی ڕۆژهەڵات، باشوور و باکووری کوردستان و ناوەڕاست و باشووری عێراقن، تەنانەت خەڵکی فەڵەستینیشی تێدایە، ژمارەیان 53 فەقێیە و ئەمڕۆ بە ئامادەبوونی دکتۆر شێخ مادح شێخ عوسمان سیراجەدینی نەقشبەندی دەبن بە مەلا.

- لە ڕێوڕەسمەکەدا میوانێکی زۆر لە سەرانسەری کوردستان، عێراق و ناوچەکانی دیکەوە سەردانی بیارەیان کردووە و  900 کیلۆ گۆشت، 250 کیلۆ فاسۆلیا و 600 کیلۆ برنج بۆ میوانەکان ئامادەکران.

ئەوەی پێویستە بیزانیت: خانەقای بیارە لە ڕابردوودا بە ئەزهەری کوردستان ناسرابوو، بە بەردەوامی نزیکەی 150 فەقێ تێیدا دەخوێنن، لە تەمەنی شەش ساڵییەوە تاوەکو تەمەنی پێگەیشتوو لەو خانەقایە دەخوێنن و دواتر ئیجازەی مەلایەتی وەردەگرن.

ئەمەش بزانە: لە کوردستان دوو تەریقەتی سەرەکی هەیە، تەریقەتی نەقشبەندی و تەریقەتی قادری، نەقشبەندییەکان خانەقا و سۆفییان هەیە ، بەڵام قادرییەکان دەروێش و تەکێیان هەیە.

زانیاریی زیاتر: تەریقەتی نەقشبەندی بۆ یەکەمجار لەسەر دەستی مەولانا خالیدی نەقشبەندی هاتووەتە کوردستان، دوو خەلیفەی هەبوو، یەکێکیان شێخ ئەحمەدی بارزان و ئەوەی دیکەشیان شێخ عوسمان سیراجەدینی یەکەم.