هاووڵاتیان داوای داخستنی بەنزینخانەكانی نێو كۆڵان و گەڕەكەكان دەكەن

ئاڤا نیوز

داوا دەكرێت ئەو بەنزینخانانەی لەنێو ماڵان و نزیك قوتابخانە و شوێنی نیشتەجێبوونن، دابخرێن.

چیرۆكی سەرەكی: ژمارەیەك هاووڵاتی هانایان بۆ دەزگای داواكاریی گشتی هێناوە، بەمەبەستی داخستنی ئەو بەنزینخانانەی لە ڕابردوو و ئێستادا بە نایاسایی لەناوجەرگەی گەڕەك و لەنزیك قوتابخانە و مزگەوت و شوێنە كۆمەڵایەتییەكان دروستكراون، ئەوەش لەپێناو پاراستنی سەلامەتی هاووڵاتیان لەكاتی ڕووداوی ئاگركەوتنەوە و دوورخستنەوەی گاز و سووتەمەنییە زیانبەخشەكان.

زانیاریی بەدەستهاتوو: ئاڤا زانیویەتی لیژنەكانی تۆماركردنی داوای مافی گشتی ڕاسپێردراون بەدواداچوون بۆ ئەو بابەتە بكەن و لە ئەگەری بوونی هەر بەنزینخانەیەك لە دەرەوەی مەرج و میكانیزمی ڕێگەپێدراو، لیژنەكانی سەر بە پارێزگای هەولێری لێ ئاگاداربكرێتەوە، بەمەبەستی گرتنەبەری ڕێكاری پێویست بۆ لابردنیان.

ئەوەی پێویستە بیزانیت: بەپێی ڕێنمایی و مەرجەكانی وەزارەتی شارەوانی و گەشتوگوزاری حكومەتی هەرێمی كوردستان، بەڕێوەبەرایەتیی نەخشەدانانی ئاوەدانی، مۆڵەتی كردنەوەی بەنزینخانە كاتێك دەدرێت كە وێستگەی سووتەمەنی لانیكەم 40 مەتر لە شوێنی نیشتەجێبوونی هاووڵاتییانەوە دووربێت، كە بەگوێرەی ڕێنماییە كۆنەكە دوورییەكە تەنیا 20 مەتر بوو. هاوكات كردنەوەی بەنزینخانە لەنێو كۆڵانی گەڕەكەكان بەهەموو شێوەیەك قەدەغەیە، هەروەها دووری بەنزینخانە و كۆگاكانی سووتەمەنی لە بینای كۆبوونەوە گشتییەكانی هاوشێوەی: (قوتابخانە، نەخۆشخانە، مزگەوت، هۆڵی كۆبوونەوەكان) پێویستە لانیكەم 100 مەتر بێت.

بۆچی گرنگە: لەپێناو پاراستنی سەلامەتی هاووڵاتییانە لەكاتی هەر ڕووداوێكی نەخوازراو و ڕێگریكردن لە پیسبوونی ژینگە، بەتایبەت لە شوێنی نیشتەجێبوونی هاووڵاتییان.