کێشەی خەڵک؛ 300 ماڵ لە سەیدسادق لە ڕێگەی ئاڤاوە داوای چارەسەرێک بۆ کێشەی گەڕەکەکەیان دەکەن

ئاڤا نیوز

 

لە قەزای سەیدسادق، دانیشتووانی گەڕەکی ڕاپەڕین بەهۆی فڕێدانی پاشماوە لە چەمێکی نزیک لە گەڕەکەکەیان کە بووەتە هۆی بڵاوبوونەوەی بۆنێکی ناخۆش، لە ڕێگەی ئاڤاوە داوا دەکەن کێشەکەیان چارەسەر بکرێت.

 

چیرۆکی سەرەکی: دانیشتووانی گەڕەکی ڕاپەرین لە قەزای سەیدسادق کە نزیکەی 300 خێزانی تێدا نیشتەجێن، بەهۆی ناخۆشی بۆنی چەمی چەقان کە دەکەوێتە ناوەڕاستی گەڕەکەکەیان هاواریان لێ هەڵساوە، چەمەکە بووەتە شوێنێک لەلایەک هاووڵاتییان خۆڵ و خاشاک و لەلایەکی دیکە پاشماوەی قەسابخانەیەکی شارەکەی تێدا فڕێ دەدرێت و چەمەکە وەک ئاوەڕۆی لێهاتووە. هەرچەندە کارمەندانی شارەوانی هەفتانە سێ جار هەوڵی پاککردنەوەی چەمەکە و دەوروبەری دەدەن، بەڵام کێشەکە گەورەترە بەمشێوەیە چارەسەر بکرێت.

 

لێدوانی تایبەت: هەمزە محەممەد، سەرۆک شارەوانی سەیدسادق لەبارەی کێشەی گەڕەکەکە و  قەسابخانەکە کە  پاشماوەکەی فڕێدەداتە ئەو چەمە، بە ئاڤای ڕاگەیاند، "زەوی قەسابخانەکە موڵکی شارەوانییە، بەڵام قایمقامیەت ڕێگەی پێداوە ئاوا ئیش بکات".

 

چارەسەرەکان: لەبارەی چارەسەریش کە ئەو چەمە بکرێتە ئاوەڕۆیەکی سندوقی، هەمزە محەممەد دەڵێت، "بۆ چارەسەرکردنی ئاوەڕۆ سندوقییەکە بڕی شەش ملیار دینارمان پێویستە، دەرخستەمان داوەتە وەزارەت، بەڵام بودجە نییە خەرج بکرێ".

 

زانیاریی زیاتر:  بەگوتەی سەرۆکی شارەوانی هاووڵاتیانیش پاشماوەکانیان دەخەنە چەمەکەوە، ئەگەر وانەکەن و لە شوێنێک کۆی بکەنەوە شارەوانی دەچێت لە شوێنێکی دوورتر فڕێی دەدات.