حکومەتی عێراق ڕێوشوێنی نوێ بۆ هەناردەکردنی بەرهەمە نەوتییەکان دەگرێتەبەر

ئاڤا نیوز

حکومەتی عێراق لێکۆڵینەوە لەسەر سنووردارکردنی هەناردەکردنی بەرهەمە نەوتییەکان دەکات و پرۆسەکە تەنیا لەڕێگەی کۆمپانیای سۆمۆوە ئەنجام دەدرێت.

چیرۆکی سەرەکی: محەممەد شیاع سوودانی، سەرۆکوەزیرانی عێراق، ڕۆژی یەکشەممە، سەرپەرشتی کۆبوونەوەیەکی کرد کە تەرخانکرابوو بۆ بەدواداچوونی دۆسیەی شایستە داراییەکانی پڕۆژەکانی وزە (کارەبا و نەوت).

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق "لە کۆبوونەوەکەدا، کە بە ئامادەبوونی وەزیری دارایی، وەزیرانی نەوت و کارەبا و ژمارەیەک ڕاوێژکار و بەرپرسی جێبەجێکار بەڕێوەچوو، ڕێگەکانی زیادکردنی داهاتی گەنجینەی گشتی لەڕێگەی بەرزکردنەوەی توانای هەناردەکردنی بەرهەمە نەوتییەکان (گازوایل، نەوتی ڕەش، خەستکەرەوەکان) و بەرهەمەکانی دیکە دوای بەدەستهێنانی خود دابینکردن، تاوتوێ کران."

زانیاریی زیاتر: هەر بەگوێرەی ڕاگەیێنراوەکە "لە کۆبوونەوەکەدا میکانیزمێک بۆ بەڕێوەبردنی داهات و سنووردارکردنی هەناردەکردنی بەرهەمە نەوتییەکان تەنیا لەڕێگەی کۆمپانیای بەبازاڕکردنی نەوت (سومۆ) گفتوگۆی لەسەر کرا."

لەلایەکی دیکەوە: لەبارەی کەرتی کارەباوە، سوودانی وەزارەتی کارەبای ڕاسپارد "لێکۆڵینەوە لەسەر مۆدێلە ئابوورییەکانی پڕۆژە وەبەرهێنانییەکان بکات" و جەختی لەسەر "پێویستی بەردەوامبوون لە پلانەکانی چاکسازی ئابووری و دارایی کردەوە، بەتایبەت ئەوانەی پەیوەندییان بە سوودوەرگرتن لە سامانی نەوت و بەرزکردنەوەی ڕێژەی پاڵاوتنی نەوتی خاوەوە هەیە بەپێی پلانە دیاریکراوەکان، بۆ بەرهەمهێنانی زیاتری بەرهەمە نەوتییە بەکوالێتی و بەنرخەکان."