ڕوبیۆ: ڕووسیا هێزێکی گەورەی جیهانییە و دەبێت لەگەڵی گفتوگۆ بکەین

ئاڤا نیوز

وەزیری دەرەوەی ئەمریکا ڕایگەیاند، ڕووسیا هێزێکی گرنگی جیهانییە کە خاوەنی گەورەترین کۆگای سەربازیی ئەتۆمیی تاکتیکی و دووەم گەورەترین کۆگای چەکی ئەتۆمیی ستراتیژییە و کاریگەریی لە سەر چەندین ناوچەی گرنگی جیهان هەیە. ئەو گوتیشی هەر بۆیە پێویستە لەگەڵی گفتوگۆ بکەین. 

لێدوانی فەرمی: مارکۆ ڕوبیۆ، وەزیری دەرەوەی ئەمریکا ڕایگەیاند:

- ئەمریکا لە سەردەمی جۆ بایدن پەیوەندییەکانی لەگەڵ ڕووسیا پچڕاند، ئەمەش بە جۆرێک بوو کە تەنانەت لە کاتی شەڕی ساردیش وێنەی نەبووە.

- ئێستا هەر دوو وڵات لە زۆر پرسدا جیاوازییان هەیە، بەڵام دەتوانن لە زۆر بواردا پێکەوە هاوکاری و هاوئاهەنگییان هەبێت. 

لەلایەکی دیکەوە: لەبارەی ئۆکرایناوە گوتی،

- شەڕی ئۆکراینا ڕێگرییەکە لە بەردەم ئەم هاوئاهەنگییە و پێویستە چارەسەر بکرێت، بۆ ئەمەش کۆبوونەوەی لوتکەی دۆناڵد ترەمپ و ڤلادیمیر پووتین بەڕێوەدەچێت، بەڵام ڕەتیکردەوە ئاگاداری کاتی کۆبوونەوەکە بێت.

- ڕوبیۆ ئاماژەی بەوەش کرد کە ترەمپ لە ڤۆلۆدیمیر زێلێنسکی، سەرۆکی ئۆکراینا زۆر ناڕازییە.