نوێنەری ترەمپ زێلێنسکی بە "بوێر" ناودەبات

ئاڤا نیوز

نوێنەری دۆناڵد ترەمپ لە ئۆکراینا دوای ئەوەی لەگەڵ زێلێنسکی کۆبووەوە ئەمڕۆ بە بوێر ناوی ‌هێنا.

وێنە گەورەکە:  دوای ئەوەی لیوای خانەنشینکراوی ئەمریکی کیس کیلۆگ، کە وەکو نوێنەری تایبەتی ترەمپ لە ئۆکراینا لەگەڵ ڤۆلۆدیمێر زێلێنسکی، سەرۆکی ئۆکراینا رۆژێک پێش ئێستا کۆبووەوە، ئەمڕۆ لە تۆڕی کۆمەڵایەتی ئێکس زێلێنسکی بە "سەرکردیەکی بوێر" ناو‌هێنا، ئەمەش دوای ئەوەی دێت دۆناڵد ترەمپ لە پێشووتردا زێلێنسکی بە سەرۆکێکی دیکتاتۆر ناوزەند کردبوو.

ڕاگێنراوی فەرمی: کیس کیلۆگ ئەمڕۆ لە تۆڕی کۆمەڵایەتی ئێکس بڵاویکردەوە "ڕۆژێکی درێژ و چڕ لەگەڵ سەرکردایەتی باڵای ئۆکراینا، گفتوگۆی بەرفراوان و ئەرێنی لەگەڵ زێلێنسکی شەڕکەر و بوێری نەتەوەیەک کە لە شەڕدایە و لەگەڵ تیمە بەتوانایەکەی ئاسایشی نیشتمانی ئەنجامدرا" ڤۆلۆدیمێر زێلێنسکی، سەرۆکی ئۆکرایناش بە خێرایی وەڵامی دایەوە لە تۆڕی کۆمەڵایەتی ئێکس و وتی کە کۆبوونەوەکە لەگەڵ کیلۆگ هیوا دەگەڕێنێتەوە و پێویستمان بە ڕێککەوتنی بەهێزە لەگەڵ ئەمریکا، ڕێککەوتنێک کە بەڕاستی کاربکات.

ئەوەی پێویستە بیزانیت: نوێنەرەکەی ئەمریکا لەگەڵ زێلێنسکی بۆ گفتوگۆکردن لەسەر ڕێگایەک بۆ کۆتاییهێنان بە جەنگی نێوان ڕووسیا و ئۆکراینا کۆبووەوە، دوای کۆبوونەوەکەیان بڕیار بوو کۆنگرەیەکی رۆژنامەوانی ئەنجام بدەن بەڵام لە کۆتا خولەکدا گۆڕدرا و تەنها چەند وێنەیەک گیرا،  سێرهی نیکیفۆرۆڤ وتەبێژی سەرۆکایەتی ئۆکراینا ڕایگەیاند، گۆڕانکارییەکە لەلایەنی ئەمریکاوە داوا کرا.

زانیاریی زیاتر: گەشتەکەی کیلۆگ بۆ کیێڤ هاوکات بوو لەگەڵ ململانێی ئەم دواییەی نێوان ترەمپ و زێلێنسکی کە پەیوەندییە تایبەتییەکانیان تێکداوە و گومانی زیاتری خستۆتە سەر داهاتووی پشتیوانی ئەمریکا بۆ هەوڵەکانی جەنگی ئۆکراینا.