بەهۆی تێکەڵکردنی دوو ماددەی پاککەرەوەی ماڵ ئافرەتێک گیانی لەدەستدا

ئاڤا نیوز

 

بەهۆی تێکەڵکردنی دوو ماددەی پاککەرەوە بۆ خاوێنکردنەوەی ماڵ، ئافرەتێک لە هەولێر گیانی لەدەستدا و پسپۆڕێکی پزیشكی هۆشداری دەدا.

 

چیرۆکی سەرەکی: لە چەند ڕۆژی ڕابردوودا، لە نەخۆشخانەی فریاکەوتنی رۆژهەڵاتی هەولێر ئافرەتێک گیان لەدەستدەدات، دوای پشکنین دەردەکەوتووە، بە هۆی تێکەڵکردنی دوو ماددەی پاککەرەوە بۆ خاوێنکردنەوەی ماڵ هەناسەی وەستاوە و دڵی لە کار کەوتووە. ئەو ئافرەتە لە ماوەی ساڵانی ڕابردوو بە سەرکەوتوویی چاندنەوەی جگەری بۆ ئەنجامدرا بوو، بەڵام بە هۆی تێکەڵکردنی ماددەکانی پاککەرەوەی ماڵ گیانی لەدەستداوە.

 

لێدوانی فەرمی: د.سۆران ئەحمەد، پزیشکی پسپۆڕی فریاکەوتن لە نەخۆشخانەی فریاکەوتنی رۆژهەڵاتی هەولێر بە ئاڤا میدیای وت، چەند ڕۆژێک لەمەوبەر ئافرەتێکیان هێنایە نەخۆشخانە، هەناسەی وەستا بوو دڵیشی لەکار کەوتبوو، دوای پشکنین دەرکەوت بە هۆی تێکەڵکردنی فاس و موعجیزە بووە (دوو ماددەی کیمیایین بۆ پاککردنەوە بەکاردێن). 

بە وتەی د.سۆران ئەحمەد، لە ماوەی چەند ساڵی ڕابردوودا، دەیان حاڵەتی هەناسە تەنگی بە هۆی تێکەڵکردن و بەکارهێنانی ماددەکانی پاککەرەوە هێنراون بۆ نەخۆشخانەی ڕزگاری و سێ بۆ چوار حاڵەتی مردن بە هەمان هۆکار هەبووە.

 

هۆکارە زانراوەکان: پزیشکانی پسپۆڕ دەڵێن، تێکەڵ کردنی ماددەی پاککەرەوە دەبێتە هۆی دروستکردنی چەندین گازی مەترسیدار و بکوژی وەکو گازی کلۆرین، کلۆرۆفۆرم. ئەو گازانە زۆر بە خێرایی وا دەکەن ڕێڕەوی هەناسەت تەسک بکەنەوە و سیەکانت لە کار بکەون.