هەڵبژاردنی پەرلەمانی ئەڵمانیا بە بەشداری 59 ملیۆن کەس بەڕێوەدەچێت

ئاڤا نیوز

 

سبەی هەڵبژاردنی پێشوەختەی پەرلەمانی ئەڵمانیا بەڕێوەدەچێت، ئەوەش دوای وەرگرتنەوەی متمانە لە كابینەكەی ئۆلاف شۆڵتز بەهۆی قەیرانی سیاسییەوە.

 

وێنە گەورەكە: پەرلەمانی ئەڵمانیا لە 16-12-2024 متمانەی لە حكومەتەكەی ڕاوێژكار ئۆلاڤ شۆڵتز، وەرگرتەوە، ئەوكات بڕیاردرا هەڵبژاردنی پەرلەمان حەوت مانگ پێشبخرێت و لە 23-2-2025 بەڕێوەبچێت.

 

ئەوەی پێویستە بیزانیت: لە هەڵبژاردنی پێشوەختەی پەرلەمانی ئەڵمانیا، چوار هەزار و 506 كاندیدی پارتە سیاسییەكان ڕكابەری لەسەر بردنەوەی 630 كورسیی پەرلەمانی دەكەن. لە سەرانسەری ئەڵمانیاش سەرووی 59 ملیۆن كەس مافی دەنگدانیان هەیە.

 

ئەوەی پێشبینی دەكرێت: بەپشتبەستن بە ڕاپرسیەکان، پێشبینی دەکرێت دەنگەكانی پارتی دیموکراتی کۆمەڵایەتیی بە سەرۆکایەتی ئۆلاف شۆڵتز، ڕاوێژکاری ئەڵمانیا، بەڕێژەیەكی بەرچاو کەم بێتەوە و ئەو پارتە لە پلەی یەكەمەوە بۆ پلەی سێیەم دابەزێت و پارتەکانی یەكێتیی دیموکراتی کریستیان بە سەرۆكایەتیی فرێدریك مێرز، و یەکێتیی کۆمەڵایەتیی کریستیان بە سەرۆکایەتیی مارکەس سۆدەر، براوەی یەکەم و دووەمی هەڵبژاردنەكە بن.

 

باكگراوند: لە مانگی نۆڤێمبەری ساڵی ڕابردوو، ئۆلاف شۆڵتز، ڕاوێژكاری ئەڵمانیا، کریسچم لیندنەر، وەزیری دارایی و سەرۆکی پارتی دیموکراتی ئازاد، کە یەکێک بوو لە پێکهێنەرانی حکومەتەكەی، لە پۆستەکەی لادا. ئەوەش بووە هۆی ئەوەی پارتەکەی لە حکومەت بکشێنێتەوە و سەرەنجامیش هاوپه‌یمانیی حكومه‌ت هه‌ڵوه‌شایه‌وه‌ و دوای مانگێک و 10 ڕۆژ لەو پێشهاتە، پەرلەمانی ئەڵمانیا متمانەی لە شۆڵتز وەرگرتەوە.