سەرۆکوەزیران بارزانی و باڵیۆزی بەریتانیا هاوڕابوون لە سەر گرنگی پێکهێنانی حکومەتێکی بەهێز و یەکگرتوو

ئاڤا نیوز

 

ئەمڕۆ یەکشەممە 23-2-2025، سەرۆکوەزیران مەسرور بارزانی، پێشوازی لە ستیڤن هیچن، باڵیۆزی بەریتانیا لە عێراق کرد، لە کۆبوونەوەیەکدا کە ئەندرۆ بیزلی، کونسوڵی گشتیی بەریتانیا لە هەرێمی کوردستان  ئامادەی بوو، لەبارەی چەند پرسیکەوە، گفتوگۆ کرا.

 

ڕاگەیێنراوی فەرمی: بەپێی ڕاگەیێنراوی حکومەتی هەرێمی کوردستان لە کۆبوونەوەکەدا، دۆخی گشتیی عێراق و ناوچەکە، پێویستیی چارەسەرکردنی کێشەکانی نێوان هەرێمی کوردستان و حکومەتی فیدراڵ لەسەر بنەمای دەستوور، ڕێزگرتن لە قەوارەی دەستووریی و فیدراڵیی هەرێم تاوتوێ کران.

 

لەلایەکی دیکەوە: تەوەرێکی دیکە کۆبوونەوە، تایبەت بوو بە گفتوگۆکانی پێکهێنانی کابینەی نوێی حکومەتی هەرێمی کوردستان، هەردوولا هاوڕابوون لەسەر گرنگیی پێکهێنانی حکومەتێکی بەهێز و یەکگرتوو و خزمەتگوزار لە زووترین کاتدا، لە پێناو ڕووبەڕووبوونەوەی ئاڵنگارییەکان، درێژەدان بە کارنامەی چاکسازی و خزمەتکردنی هاووڵاتییانی هەرێمی کوردستان.