یەكەمین گەشتی ئاسمانیی ڕاستەوخۆ لەنێوان هەولێر و ئەسینا دەستیپێدەکات

ئاڤا نیوز

ئەمڕۆ لە فڕۆكەخانەی نێودەوڵەتیی هەولێر، یەكەمین گەشتی ئاسمانیی ڕاستەوخۆ لەنێوان هەرێمی كوردستان و یۆنان دەستیپێكرد، هەفتانەش دوو گەشتی ڕاستەوخۆ لەنێوان هەولێر و ئەسینا دەبێت.

چیرۆكی سەرەكی: ئەمڕۆ یەکشەممە، بە ئامادەبوونی نیکۆلاس سترینگولس، کونسوڵی گشتیی یۆنان لە هەرێمی کوردستان و ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر، یەکەمین گەشتی ڕاستەوخۆ لە هەولێر بۆ ئەسینا، لەڕێگەی هێڵی ئاسمانیی ئەجیان لە فڕۆکەخانەی نێودەوڵەتیی هەولێر دەستی پێکرد.

ڕاگەیێنراوی فەرمی: هەریەك لە كونسوڵی گشتی یۆنان و بەڕێوەبەری فڕۆكەخانەی نێودەوڵەتیی هەولێر جەختیان لە بەرەوپێشچوونی زیاتری پەیوەندییەکان کردەوە، کە دەکرێت لەڕێگەی ئەم پەیوەندییانەوە، هەرێمی کوردستان بەرەوپێشچوونی زیاتر بەخۆیەوە ببینێت.

بۆچی گرنگە: دەستپێكردنی گەشتی ڕاستەوخۆی نێوان پایتەختی هەرێمی كوردستان و پایتەختی وڵاتێكی ئەوروپی، هاوكار دەبێت بۆ بەهێزكردنی پەیوەندییەكانی نێوان هەرێمی كوردستان و وڵاتانی ئەوروپا، ئەمەش كاریگەری ڕاستەوخۆی لەسەر دۆخی ئابووری و سیاسی و كۆمەڵایەتی هەیە.

ئەوەی پێویستە بیزانیت: ئێستا هەفتانە دوو گەشتی ڕاستەوخۆ لەنێوان هەولێر و ئەسینا و بەپێچەوانەوە هەیە، لە داهاتووشدا ژمارەی گەشتەکان زیاتر دەبێت.