شارەوانی هەولێر بایەخ بە جوانكردنی سیمای دەروازەكانی هاتنە ناو شار دەدات

ئاڤا نیوز

سەرۆكی شارەوانیی هەولێر بە پێویستی دەزانێت كار بۆ ڕێكخستنەوەی ڕێگاوبان و شۆستە و شەقامەكانی شاری هەولێر بكرێت، بەتایبەت ڕێكخستنەوەی سیمای دەروازەكانی هاتنە ناوەوەی شاری هەولێر.

وێنە گەورەكە: لەسەر ڕاسپاردەی وەزیری شارەوانی و گەشتوگوزاری حكومەتی هەرێمی كوردستان، لە شاری هەولێر ئەندازیار كارزان عەبدولهادی، سەرۆكی شارەوانیی هەولێر كۆبوونەوەیەكی لەگەڵ سەرجەم بەڕێوەبەرایەتیی و بەشەكانی سنووری شارەوانییەكانی هەولێر ئەنجامدا كە ئامانج لێی پەرەپێدانی زیاتری ئاوەدانی و خێراكردن و چڕتركردنی كار و پڕۆژە خزمەتگوزارییەكان بوو.

ڕاگەیێنراوی فەرمی: سەرۆكایەتیی شارەوانیی هەولێر لە ڕاگەیێنراوێكدا بەپێویستی دەزانێت لەپێناو بەخشینی سیمایەكی جوانتر و نیشاندانی ڕووێكی گەشی شارستانی، سەرجەم شەقام و باخچە و پاركەكان ڕێكبخرێنەوە و چاڵ و شكستی شەقامەكان چاكبكرێنەوە، هەروەها بە لەبەرچاوگرتنی دۆخی كاسبكاران و خاوەن پیشەكانی نێو بازاڕەكانی هەولێر، شۆستە و شەقامی شوێنە گشتییەكان ڕێكبخرێنەوە.

بۆچی گرنگە: سەرۆكایەتیی شارەوانیی هەولێر هەماهەنگی و كاری پێكەوەیی تەواوی بەڕێوەبەرایەتییەكانی شارەوانی و ئەندازەی پاركەكان بەپێویست دەزانێت لەپێناو ڕێكخستنەوەی پارك و باخچە و درەخت و جوانكارییەكانی نێوان شەقام و شۆستەكان.