توالێتێکی سێ ملیۆن دۆلاری لە کۆشکی شاهانەی بێلنهام دەدزرێت

ئاڤا نیوز

 

زۆرن ئەو چیرۆکانەی کە باس لە دزی شتی دەگمەن و بچووک دەکرێت بەڵام لە ڕووداوێکی سەیری دزیکردندا، توالێتێکی لە زێڕ دروستکراو لە کۆشکی شاهانەی بێلنهام دەدزرێت. 

 

چیرۆکی سەرەکی: هونەرمەندێک بە ناوی ماوریز کاتێلان  ساڵی  2019 توالێتێک لە زێڕ دروست دەکات بۆ کۆشکی شاهانەی بێلنهام لە بەریتانیا، کە نرخەکەی دوو ملیۆن و 800 هەزار دۆلار بوو، بەڵام لە ڕووداوێکی دزیکردا تەنها لە ماوەی چەند خولەکێکدا ئەو توالێتە بە پارچە پارچەکراوی دەدزرێت. 

 

زانیاریی زیاتر: ئاشکرابوونی دزیەکە بەهۆی لێچوونی ئاوەوە بووە لە کۆشکەکەدا، گومان دەکرێت ئەو کەسانەی کە لەو کۆشکە کاریان کردووە یاخود سەردانیان کردووە ئەو کارەیان ئەنجام دابێت. 

 

ئەوەی پێویستە بیزانیت: دوای گەڕان و پشکنینی پۆلیس دەرکەوتووە کەسێک بەناوی جەیمس شین،  تەمەنی 40 ساڵ سەرپەرشتی دزییەکەی کردووە و دوای لیکۆڵینەوە دانی ناوە بە تاوانەکەیدا، بەڵام ئاسەواری ئەو تەوالێتە نەماوە بەهۆی فرۆشتنی بە پارچە پارچە کراوی.