ئیمانوێل ماکرۆن: ئەگەر پووتین ڕێگری لێنەکرێت وڵاتانی دیکەش داگیردەکات

ئاڤا نیوز

سەرۆکی فەرەنسا لە چاوپێکەوتنێکدا هۆشداریدا لەوەی ئەگەر ڤلادیمێر پووتین، سەرۆکی ڕووسیا ڕێگری لێنەکرێت، ئەوا بە دڵنیاییەوە دەچێتە مۆڵدۆڤا و ڕەنگە بشچێتە ڕۆمانیا.

وێنە گەورەکە: شەڕە قسەکەی دۆناڵد ترەمپ، سەرۆکی ئەمریکا و ڤۆلۆدیمێر زیلینسکی، سەرۆکی ئۆکراینا لە کۆشکی سپی کاردانەوەی جیاجیای لێکەوتەوە و وڵاتانی ڕۆژئاواش داوایان کرد ئەو دوو وڵاتە ڕێز لەیەکتر بگرن.

ڕاگەیێنراوی فەرمی: کۆشکی ئیلیزێی فەرەنسا ئاشکرای دەکات کە ئیمانوێل ماکرۆن، سەرۆکی فەرەنسا لەگەڵ هەریەک لە دۆناڵد ترەمپ و ڤۆلۆدیمێر زیلینسکی پەیوەندی تەلەفۆنی ئەنجامداوە و ڕایگەیاندووە،

- "داوا لە ترەمپ و زیلینسکی دەکەم ئارام بگرن و ڕێزی یەکتر بگرن بۆ ئەوەی بتوانن بەرەوپێش بچن".

- کشانەوەی ئەمریکا لە دۆسیەی ئۆکراینا لە بەرژەوەندی ئەو وڵاتە نییە، چونکە ئەوەی سێ ساڵە ئەمریکا دەیکات بە تەواوی لەگەڵ نەریتە دیپلۆماسی و سەربازییەکانیدا یەکدەگرێتەوە.

- ئەگەر واشنتن بەبێ هیچ گەرەنتییەکی ئەمنی بۆ ئۆکراینا ڕەزامەندی دەرببڕێت کە ڕێککەوتنی ئاگربەست واژۆ بکات، ئەوا توانای دابینکردنی ڕێگری جیۆستراتیژی لە بەرامبەر ڕووسیا و چین و ئەوانی دیکەدا لە هەمان کاتدا نامێنێت.

ئەوەی پێویستە بیزانیت: وڵاتانی ئەوروپا دەیانەوێت ئەمریکا لە چوارچێوەی هاوکاریکردنی ئۆکراینا بمێنێتەوە و ئیدارەکەی ترەمپیش سوورن لەسەر ڕێککەوتنی ئاگربەستی نێوان ڕووسیا و ئۆکراینا بە هەر نرخێک بێت، ئەمەش وڵاتانی ئەوروپای نیگەران کردووە و دەیانەوێت ئاگربەستەکە لە بەرژەوەندی ئۆکراینا و داهاتووی وڵاتەکانیان بێت.