ئێران وەزیری ئابووری وڵاتەکەی دەستنیشان دەکات

 

ئاڤا نیوز

دوای دوورخستنەوەی عەبدولناسر هیمەتی وەزیری ئابووری ئێران لە پۆستەکەی لەلایەن پەرلەمانیی ئێرانەوە، ڕەحمەتوڵڵا ئەکرەمی کرایە وەزیری ئابووری ئێران بە وەکالەت.

وێنە گەورەکە: بەهۆی سزاکانی ئەمریکا و وڵاتانی ڕۆژئاوا، ئابووری ئێران نزیکە لە داروخان و ئەو وڵاتە قەیرانێکی تووندی تووش بووە کە چارەسەرکردنی مەحاڵە.

زانیاری زیاتر: لەدوای لابردنی وەزیری ئابووری ئێران لە پۆستەکەی، ڕەحمەتوڵڵا ئەکرەمی بە وەزیری ئابووری و دارایی ئێران بە وەکالەت دەستنیشانکرا کە پێشتر وەک بریکاری وەزیری ئابووری بەرپرسی چاودێریکردنی دارایی و گەنجینەی وڵاتەکە بووە. هەروەها بۆ ماوەی دوو مانگ، لە مانگی ئەیلول تا تشرینی دووەمی 2018 وەک بەرپرسی وەزارەتی کاروباری ئابووری و دارایی لە حکومەتی ڕوحانی کاری کردووە.

ئەوەی پێویستە بیزانیت: ئەمڕۆ پەرلەمانی ئێران لەسەر لێپرسینەوە لەگەڵ وەزیری دارایی وڵاتەکەیان کۆبوونەوە و لەو چوارچێوەیەشدا مەسعود پزیشکیان سەرۆکی ئێران کێشە ئابورییەکانی وڵاتەکەی بۆ سزا ئابوورییەکانی ئەمریکا بۆسەر ئێران گەڕاندەوە.