ناتۆ: ئەوروپا دەبێت بارگرانی لەسەر ئۆکراینا هەڵبگرێت

 

ئاڤا نیوز

وڵاتانی ئەوروپا بڕیاریاندا بودجەی بەرگری وڵاتەکانیان زیادبکەن و داواش دەکەن ئەمریکا بەردەوام بێت لە هاوکارییەکانی بۆ ئۆکراینا.

وێنە گەورەکە: بەریتانیا میوانداری لوتکەی سەرکردەکانی ئەوروپای کرد بۆ پشتگیریکردن لە سەرۆکی ئۆکراینا ڤۆلۆدیمیر زێلێنسکی و بەهێزکردنی بەرگری وڵاتانی ئەوروپا دوای دەمەقاڵێیەکەی دۆناڵد ترەمپ سەرۆکی ئەمریکا و ڤۆلۆدیمیر زێلێنسکی سەرۆکی ئۆکراینا لە کۆشکی سپی.

لێدوانە فەرمییەکان:

کیێر ستارمەر، سەرۆکوەزیرانی بەریتانیا ڕایگەیاند، ئەوروپا دەبێت کاری قورس ئەنجام بدات، بەڵام بۆ پشتگیریکردن لە ئاشتی لە کیشوەرەکەیاندا و سەرکەوتن، دەبێت پشتگیرییەکی بەهێزی ئەمریکای هەبێت، لەسەر هەنگاوە گرنگەکانیش ڕێککەوتین کە بریتین لە بەردەوامی یارمەتییە سەربازییەکان بۆ ئۆکراینا و هێشتنەوەی سزاکان دژی ڕووسیا.

مارک ڕوتە سکرتێری گشتی ناتۆ ڕایگەیاند، زۆربەی وڵاتانی ئەوروپا خەرجییەکانی بەرگرییان زیاد دەکەن، و ئەمریکا پابەندە بە ناتۆ. هاوکات ئەوروپا دەبێت بارگرانی لەسەر ئۆکراینا هەڵبگرێت، بەڵام پێویستی بە پشتیوانی ئەمریکا هەیە.

ئۆرسولا ڤۆن دێر لاین سەرۆکی کۆمیسیۆنی ئەوروپا هۆشداری دا کە دەبێت پەلە بکرێت لە چەکدارکردنەوەی ئەوروپا، ئێمە ئامادەین بەرگری لە دیموکراسی بکەین، بەرگری لەو بنەمایە بکەین کە سەروەری یاسان، ناتوانیت دراوسێکەت داگیر بکەیت و دراوسێکەت بچەوسێنیتەوە، یان ناتوانیت بە هێز سنوورەکان بگۆڕیت، ئەوە بەرژەوەنی هاوبەشە رێگری لە جەنگەکانی داهاتوو دەکەین.

باکگراوند: لە 24ـی مانگی شوباتی 2022 ڕووسیا هێرشی کردە سەر ئۆکراینا و تائێستا شەڕ لە نێوان ئەو دوو وڵاتە بەردەوامە و بە هەزاران سەرباز و هاوڵاتی هەردوو وڵاتەکە گیانیان لەدەستداوە و برینداربوون.