بەریتانیا: کاری لە پێشینەمان پاراستنی گەلەکەمانە

 

ئاڤا نیوز

کیەر ستارمەر سەرۆکوەزیرانی بەریتانیا ڕایگەیاند، کاری لە پێشینەی حکومەتەکەی دابینکردنی ئاسایش و سەلامەتی هاوڵاتیانی بەریتانیایە.

چیرۆکی سەرەکی: سەرۆکوەزیرانی بەریتانیا کیەر ستارمەر و جۆن هیلی وەزیری بەرگری لەگەڵ ئەندامانی پیشەسازی بەرگری وڵاتەکەیان کۆبوونەوە، ئەمەش دوای ئەوەی هەفتەی پێشوو حکومەتی بەریتانیا بەڵێنیدا بودجەی بەرگری وڵاتەکەی بە ڕێژەی 2.5%ـی لە ساڵی 2027 زیادبکات.

لێدوانە فەرمییەکان:

کیەر ستارمەر سەرۆکوەزیرانی بەریتانیا ڕایگەیاند، کاری لە پێشینەی حکومەتەکەی ئاسایش و سەلامەتی گەلی بەریتانیایە، ئەرکی یەکەمی سەرۆکوەزیرانە و ئەرک و بەرپرسیارێتییەکە کە لەڕادەبەدەر بە جددی کاری بۆ دەکەن بەتایبەتی لەم کاتەدا کە دۆخی ئەوروپا و جیهان ناجێگیرە، پێکەوە کاردەکەن بۆ دابینکردنی ئاسایشی بەریتانیا و ئۆکراینا و جیهان.

جۆن هیلی وەزیری بەرگری بەریتانیا ڕایگەیاند، هەفتەی ڕابردوو سەرۆکوەزیرانی بەریتانیا ڕایگەیاند، بودجەی بەرگری زیاد دەکەن بۆ بەرزترین ئاستی خۆی و ئەمەش گەورەترین زیادکردنی بودجەی بەرگرییە لە دوای جەنگی ساردەوە.

ئەوەی ئێستا ڕوودەدات: لەسەر ئاستی ئەوروپا وڵاتان دەستیانکردووە بە زیادکردنی بودجەی بەرگرییان بۆ ڕووبەڕووبوونەوەی ئەو مەترسییانەی ڕوو لە وڵاتەکانیان دەکەن، هەروەها زیادکردنی هاوکارییەکانیان بۆ ئۆکراینا لە شەڕی دژ بە ڕووسیا.