ئەمریکا چەند سەربازێکی بە تۆمەتی سیخوڕیکردن بۆ چین دەستگیردەکات

 

ئاڤا نیوز

نووسینگەی لێکۆڵینەوەی فیدراڵی ئەمریکا (FBI) چەند سەربازێکی ئەمریکی دەستگیرکردووە کە زانیاری نهێنی و کەلوپەلی سوپای ئەمریکایان بە چین فرۆشتووە.

چیرۆکی سەرەکی: جیان ژاو، سەربازێکی ئەمریکییە و لە بنکەیەکی سەربازی لە واشنتن کاریکردووە، تۆمەتبارکراوە بەوەی لە مانگی تەمموزی 2024 هارد دیسکێکی نهێنی و کۆمپیوتەرێکی حکومەتی ئەمریکای بە بریکارە نهێنییەکانی چین فرۆشتووە و لەبەرامبەر ئەو کارەیدا 15 هەزار دۆلاری وەرگرتووە.

لێدوانی فەرمی: پام بۆندی، داواکاری گشتی ئەمریکا ڕایگەیاند، ئەو تۆمەتبارانەی دەستگیرکراون، تۆمەتبارن بە خیانەتکردن لە وڵاتەکەمان، چالاکانە کاریانکردووە بۆ لاوازکردنی تواناکانی بەرگری ئەمریکا و بەهێزکردنی نەیارەکانمان لە چین.

زانیاریی زیاتر: سەربازە ئەمریکییەکە لە دادگا تۆمەتبار کرا بە تۆمەتی پیلانگێڕی بۆ بەدەستهێنان و گواستنەوەی زانیاری بەرگری نیشتمانی، هەروەها بەرتیلدان و دزینی موڵکی حکومەت.

ئەمەش بزانە: دوو تۆمەتباری دیکە بە ناوەکانی لی تیان و ڕویو دوان کە سەرباز بوون لەلایەن نووسینگەی لێکۆڵینەوەی فیدراڵی ئەمریکا (FBI) بە تۆمەتی دزینی موڵکی حکومەت و بەرتیلدان دەستگیرکراون و ئەوەی دووەمیان زانیاریی سەربازیی هەستیاری پەیوەست بە تواناکانی ئۆپەراسیۆنی سوپای ئەمریکا کۆکردووەتەوە، بەتایبەتی سەبارەت بە سیستەمی چەکی سەربازی ئەمریکا، و لە نێوان تشرینی دووەمی 2021 و کانوونی دووەمی 2024ـدا ئەو زانیاریانەی بە چین فرۆشتووە.