دەستەی سەربەخۆی مافی مرۆڤ: پێویستە ئافرەتان بەشداریی ڕاستەقینەیان لە حكومڕانی هەبێت

ئاڤا نیوز

دەستەی سەربەخۆی مافی مرۆڤ ڕایدەگەیەنێت، سەرەڕای ئەوەی ژنان بەشداریی گەورەیان لە بەڕێوەبردن و حكومڕانی لەسەر ئاستی دامەزراوە فەرمییەكانی هەرێمی كوردستان هەیە، كەچی هێشتا لە ئاست پێگە و ڕۆڵی ئافرەتان نییە و پێویستە بەشداریی ڕاستەقینەیان هەبێت.

 

وێنە گەورەكە: بەبۆنەی ڕۆژی 8ـی مارس، ڕۆژی جیهانیی ئافرەتان، دەستەی سەربەخۆی مافی مرۆڤ لە هەرێمی كوردستان پەیامێكی پیرۆزبایی بڵاوكردەوە.

 

ڕاگەیێنراوی فەرمی: دەستەی مافی مرۆڤ ئاماژە بەوە دەدات، ئافرەتانی کورد بەدرێژایی مێژوو ڕۆڵی گەورە و کاریگەریان هەبووە لە خەبات دژی چەوسانەوە و داکۆکیکردن لەمافەکانیان.

- هەمیشە ژنان هاوشانی پیاوان شانیان داوەتە بەر سەختییەکانی ژیان و لەخۆشی و ناخۆشیدا پێکەوە لەیەک سەنگەردا بوونە.

- ئێستا ژنان بوێرانەتر داکۆکی لەمافەکانی خۆیان دەکەن و خۆیان بەشدارن لەداڕشتن و هەمواری یاساکان و هەڵوەشانەوەی هەندێ لەو یاسایانەی کۆت و بەندی ئافرەتان دەکەن.

- ئێستا ژنان خۆیان بەشداریی گەورەیان هەیە لە بەڕێوەبردن و حوکمڕانی لەسەر ئاستی دامەزراوەکانی هەرێمی کوردستان کە هەرچەند هێشتا لەئاست پێگە و ڕۆڵی ئافرەتان نییە.

 

خاڵە نەرێنییەكان: بەداخەوە هێشتا حاڵەتەكانی کوشتنی ژنان، بەبیانووی جیاواز و ناو و ناتۆرەی بێ بنەما دەبیستین کە تەواو پێچەوانەی بنەماکانی مافی مرۆڤ و ناوەرۆکی ئایینە ئاسمانییەکانە.

- بەهیچ شێوەیەک لەگەڵ کوشتنی ژنان و جیاوازیکردن نین بەرامبەر ژنان.

- پێویستە ڕۆڵی زیاتر بدرێتە بە ئافرەتان بۆ بەشداریی ڕاستەقینەیان لە حوکمڕانی و داکۆکیکردن لەمافەکانی خۆیان.