سەرۆک و ئەندامانی دەستەی کارگێڕیی یانەی هەولێر دەستیان لەکار کێشایەوە

کوردستان
8 ئازار

شەیری بکە لە:

سەرۆک و ئەندامانی دەستەی کارگێڕیی یانەی هەولێر دەستیان لەکار کێشایەوە

دەستەی کارگێڕی پێشووی یانەی هەولێر

ئاڤا نیوز

سەرۆک و ئەندامانى دەستەى کارگێڕى یانەى هەولێر، دەستیان لە کارکێشایەوە و لە ماوەى 45 ڕۆژى داهاتووشدا هەڵبژاردنی دەستەی كارگێڕیی یانەکە دەکرێت.

وێنە گەورەکە: ئەمرۆ شەممە 08-03-2025، ئومێد خۆشناو، پارێزگارى هەولێر، لە دیوانى پارێزگا لەگەڵ سەرۆک و ئەندامانى دەستەى کاتى کارگێڕى یانەى وەرزشى هەولێر کۆبۆوە.

ڕاگەیێنراوی فەرمی: بەپێی ڕاگەیێنراوەکە، پارێزگاری هەولێر ئاماژەی بەوە کردووە،

- "یانەى هەولێر وەک یانەى دایک و خاوەن مێژوویەکى پڕشنگدار و ناوێکى بەرز، لە سەرووى هەموومانەوەیە و ڕێگە نادەین ببێتە قوربانی".

- "ئامانجى هەموومان خزمەتکردن و بەرەو پێشبردنى یانەکەبووە، لەو پێناوەشدا هەموو هەوڵێکمان بۆ باشترکردن و چاکترکردنى یانەکە بووە، بەڵام بە داخەوە گرفت و کێشەکان بەردەوامییان هەبووە، بۆیە پێویست بوو ئەمڕۆ هەر لە بنەڕەتەوە چارەسەری ئەو كێشانە بكرێت نەوەك بەشێوەیەكی كاتی".

ئەوەی پێویستە بیزانیت: لە کۆبوونەوەکەدا لە پێناو چارەسەرکردن و بنبڕکردنى کێشە و گرفتەكانی یانەكە و دابینکردنى ئایندەیەكی گەش و باشترکردنى ڕەوشی یانەکە، ئەو بڕیارانە درا:

یەکەم: سەرۆک و ئەندامانى دەستەى کاتى کارگێڕى یانەى هەولێر، بە گشتیى دەستیان لە کارکێشایەوە و دەست لە کارکێشانەوەکەیان قەبوڵکرا.

دووەم: هەموو ئامادەکارییەک بکرێت بۆ ئەنجامدانى هەڵبژاردنێکى ئازادانەى دەستەیەكی تازەی كارگێڕی بۆ یانەی وەرزشی هەولێر، لە ماوەى مانگێک تا 45 ڕۆژى دیکە.

سێیەم: بۆ ئەو ماوەیە، واتا لە ماوەى ئەو مانگە تا 45 ڕۆژى داهاتوو کە پڕۆسەى هەڵبژاردن ئەنجامدەدرێت، دەستەیەکى کاتى بۆ ئیدارەدانى یانەکە دەستنیشان کرا بەو مەرجەى کە نابێت خۆیان کاندید بکەن بۆ هەڵبژاردنى دەستەى کارگێڕى یانەکە، ئەوانیش بریتن لە بەڕێزان:-

1- تاهیر سابیر - سەرۆکى کاتى یانەى هەولێر.

2- زوبێر جەبار، ئەندامى کاتى دەستەى کارگێڕى.

3- د. سەرتیپ عومەر عەوڵا، ئەندامى کاتى دەستەى کارگێڕى.

4- د. ئیبراهیم محەممەد، ئەندامى کاتى دەستەى کارگێڕى.

5- د. شوان خالید، ئەندامى کاتى دەستەى کارگێڕى.