پڕۆژەی ڕووناکی حکومییە یان دراوەتە کەرتی تایبەت؟

 

ئاڤا نیوز

لە سۆشیاڵ میدیا پرسیارێک زۆر دەکرێت ئایا پڕۆژەی ڕووناکی حکومییە، بەشێکی میدیاکانیش بڵاویان کردووەتەوە کە دراوەتە کۆمپانیا و کەرتی تایبەت، ئاڤا بەدواداچوونی بۆ وەڵامی ئەو پرسیارە کرد و دەرکەوت وەڵامی پرسیارەکە دوو ڕەهەندییە.

وێنە گەورەکە: پرۆژەی ڕووناکی، پڕۆژەیەکی ستراتیژی کابینەی نۆیەمی حکومەتی هەرێمی کوردستانە، مەبەستییەتی کارەبای 24 کاتژمێری بۆ تەواوی کوردستان دابین بکات، ئێستا پڕۆژەکە لە بەشێکی زۆری هەولێر و سلێمانی جێبەجێ کراوە و ئەمڕۆش لە دهۆک دەستیپێکرد.

لێدوانی فەرمی: تیمی پڕۆژەی ڕووناکی بە ئاڤا میدیای ڕاگەیاند، پڕۆژەکە 100% حکومییە، ستافێکی حکومەت کاری لەسەر دەکات، کارەباکەش هەر هی حکومەتە و هەر ئەم کارەبایەیە کە ئێستا دەدرێتە خەڵک، تەنیا بەستی پێوەری زیرەک دراوەتە کۆمپانیا، چونکە پرۆژەی ڕووناکی دیجیتاڵییە و بە سیستەمێکی ئەلیکترۆنی زۆر پێشکەوتوو کار دەکات. بەهۆی ئەوەی نوێیە لە وەزارەتی کارەبا و کوردستان خەڵکی شارەزا نییە بیبەستێت، بۆیە بەستنەکەی دراوەتە کۆمپانیا، کۆمپانیاکە تەنیا پێوەرەکە دەبەستێت. پێوەرەکەش بەخۆڕاییە و هیچ پارەیەک لە خەڵک وەرناگیرێت حکومەت خۆی کڕیویەتی و پارەکەی داوە.

زانیاریی زیاتر: ستافێک گەنجی کورد کار لەسەر پرۆژەکە دەکەن، بە جۆرێک پرۆسەکە دەستی مرۆڤی تێدا نییە، پێوەرەکە خۆی داتا دەنێرێ بۆ داتا سەنتەر، واتا بەکارهێنەر چەند کارەبای بەکارهێناوە، ڕاستەوخۆش دەیکاتە وەسڵ.