سەرۆکوەزیران مەسرور بارزانی: دەستبەرداری مافە دەستوورییەکانمان نابین

ئاڤا نیوز

 

سەرۆکوەزیرانی هەرێمی کوردستان، بە بۆنەی ڕێککەوتننامەی 11ـی ئاداری 1970 ڕایدەگەیێنیت، بە هەموو شێوەیەک داکۆکی لە مافە دەستووریەکان دەکەین و دەستبەرداری نابین.

 

وێنە گەورەکە: لە ماوەی ڕابردوودا بە هۆی نکۆڵیکردن لە مافەکانی کورد لە عێراق چەندین شۆڕشی چەکداری سەریانهەڵدا، لە ناوەڕاستی سەدەی ڕابردوو شۆڕشی ئەیلوول توانی لە چوارچێوەی ڕێککەوتنێک لەگەڵ حکومەتی ئەوکاتەی عێراق کۆمەڵێک ماف بۆ کورد دەستەبەر بکات.

ڕاگەیێنراوی فەرمی: مەسرور بارزانی، سەرۆکوەزیرانی هەرێمی کوردستان بە بۆنەی 55 ساڵەی ڕێککەوتننامەی 11ـی ئاداری 1970 ڕایگەیاند، "دووپاتی دەکەینەوە کە گەلی کوردستان هەمیشە خوازیاری  گەیشتنە بە مافە ڕەواکانی لە ڕێگەی گفتوگۆ و شێوازی ئاشتییانە. بەڵام بە هەموو شێوەیەکیش داکۆکی لە مافە دەستوورییەکانی دەکات و دەستبەرداریان نابێت".

- لە بەشێکی دیکەی ڕاگەیێنراوەکەی سەرۆکوەزیران مەسرور بارزانی هاتووە، جەخت لە چارەسەریی بنەڕەتی و یەکجارەکی کێشەکانمان لەگەڵ حکومەتی فیدراڵ لە سەر بنەمای ڕێزگرتن لە دەستوور و ڕێککەوتنەکان و قەوارەی دەستووریی هەرێمی کوردستان دەکەینەوە".

باکگراوند: ڕێککەوتننامەی 11ـی ئاداری 1970 لە 15 خاڵ پێکهاتبوو، ڕێککەوتنەکە لە نێوان مستەفا بارزانی، ڕێبەری شۆڕشی کوردستان و ئەنجوومەنی سەرکردایەتی شۆڕشی عێراق بوو. لەم ڕێککەوتنە بۆ یەکەمجار کورد وەک پێکهاتەیەکی سەرەکی و زمانی کوردی وەک زمانی دووەمی عێراق دانیپێدانرا.