هۆشیار زێباری: ڕێککەوتنی مەزڵووم عەبدی و ئەحمەد شەرع هەنگاوێگی گرنگ و مێژووییە

ئاڤا نیوز

 

ڕێککەوتنی نێوان هێزەکانی سووریای دیموکرات "هەسەدە" و سەرۆککۆماری سووریا بۆ قۆناغی ڕاگوزەر، دەنگدانەوەی جیهانی و نێوخۆی لێکەوتەوە، بە ڕێککەوتنێکی گرنگ و مێژووی دادەنرێت.

 

وێنە گەورەکە: زیاتر لە سێ مانگ لەدوای ڕووخانی ڕژێمی بەشار ئەسەد، 10-3-2025 مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا بۆ قۆناغی ڕاگوزەر کۆبوونەوە و ڕێککەوتنێکی هەشت خاڵیان واژۆ کرد، ڕێککەوتنەکە دەنگدانەوەی جیهان و تەواوی سووریا و ناوچەکەی لێکەوتەوە، بە قۆناغێکی گرنگ بۆ ئایینده‌ی سووریا ناوەزەند دەکرێت، هۆشیار زێباری ڕایگەیاند: ڕێککەوتنی مەزڵووم عەبدی و ئەحمەد شەرع مێژووییە.

 

لێدوانی فەرمی: هۆشیاری زێباری، ئەندامی مەکتەبی سیاسی پارتی دیموکراتی کوردستان له‌ تۆڕی كۆمه‌ڵایه‌تی (ئێكس) ڕایگەیاند: ڕێككه‌وتنه‌كه‌ هه‌نگاوێكی گرنگه‌ بۆ به‌شداریی له‌ ئایینده‌ی سووریا و له‌م چوارچێوه‌یه‌شدا هه‌سه‌ده‌ ده‌مێنێته‌وه‌ و به‌ شێوه‌ی پله‌به‌ندی ده‌چێته‌ ناو دامه‌زراوه‌كانی سووریا، هاوكات ئیداره‌ی خۆسه‌ر له‌ ڕۆژئاوای كوردستان له‌ میانی دانوستان و كاری لێژنه‌ هاوبه‌شه‌كان، ده‌مێنێته‌وه‌.

 

زانیاریی زیاتر: سه‌رۆكایه‌تیی كۆماری سووریا ڕایگه‌یاندووه‌، شه‌رع و عه‌بدی ڕێككه‌وتوون هه‌سه‌ده‌ بخرێته‌ ناو سیسته‌می هێزی به‌رگریی نیشتمانی سووریا، هاوکات ڕێككه‌وتوون سه‌رجه‌م دامه‌زراوه‌ مه‌ده‌نییه‌كانی باكووری ڕۆژهه‌ڵاتی سووریا له‌وانه‌ش ده‌روازه‌ سنوورییه‌كان، فڕۆكه‌خانه‌ و كێڵگه‌كانی نه‌وت و غاز به‌ دیمه‌شقه‌وه‌ ببه‌سترێنه‌وه‌، جه‌ختیان له‌سه‌ر یه‌كپارچه‌یی خاكی سووریا و ڕه‌تكردنه‌وه‌ی دابه‌شكردنی سووریا كردووه‌ته‌وه‌.

 

ئەوەی پێویستە بیزانیت: به‌ پێی ڕێككه‌وتنه‌كه‌ ده‌بیت مافی هه‌موو سوورییه‌كان پارێزراو بێت له‌ نوێنه‌رایه‌تی و به‌شداریی پرۆسه‌ی سیاسی و سه‌رجه‌م دامه‌زراوه‌كانی دیكه‌ی ده‌وڵه‌ت له‌سه‌ر بنه‌مای لێوه‌شاوه‌یی و كارامه‌یی و دوور له‌ هه‌ر پاشخانێكی ئایینی و نه‌ژادی، كۆمه‌ڵگه‌ی كوردی كۆمه‌ڵگه‌یه‌كی ڕه‌سه‌نه‌ له‌ ده‌وڵه‌تی سووریا و ئه‌و ده‌وڵه‌ته‌ش مافی هاووڵاتیبوون و سه‌رجه‌م مافه‌ ده‌ستوورییه‌كانی ده‌سته‌به‌ر ده‌كات، بڕیار درا به‌ ڕاگرتنی شه‌ڕ له‌ سه‌رجه‌م خاكی سووریادا. هاوكات گه‌ڕانه‌وه‌ی ئاواره‌ سووریا بۆ وڵاته‌كه‌یان و پاراستنیان له‌ لایه‌ن ده‌وڵه‌ته‌وه‌ ده‌سته‌به‌ره‌ بكرێت.

 

له‌ خاڵی شه‌شه‌م و كۆتاییشدا هه‌ردوولا ڕێككه‌وتن پشتیوانی له‌ ده‌وڵه‌تی سووریای بكرێت بۆ ڕووبه‌ڕووبوونه‌وه‌ و له‌ناوبردنی پاشماوه‌كانی ڕژێمی به‌شار ئه‌سه‌د و سه‌رجه‌م ئه‌و هه‌ڕه‌شانه‌ی دیكه‌ی سه‌ر ئاسایش و یه‌كپارچیی سووریا.