پارێزگاری هەولێر لەبارەی ڕەمەزان هۆشداری بە بازرگانان و دووکانداران دەدات

ئاڤا نیوز

دیوانی پارێزگای هەولێر بە سەرپەرشتی پارێزگار کۆبووەوە، جەخت لە تووندکردنی چاودێریکردنی بازاڕ و نرخ و کەلوپەل و پێداویستییەکانی هاووڵاتیان کرایەوە، پارێزگاری هەولێر دەڵێت " ڕێگە بە کەس نادرێت نرخی خۆراک و پێداویستیەکان گران بکات".

ڕاگەیێنراوی فەرمی: پارێزگاری هەولێر ڕایگەیاند: نابێت ڕێگە بدرێت هیچ کەس، مانگی ڕەمەزانی پیرۆز بقۆزیتەوە و یاری بە بازاڕ بکات و نرخی خۆراک و کەلوپەل و پێداویستی لەسەر هاوڵاتییان گران بکات.

زانیاریی زیاتر: لیژنەکانی قائیمقامیەت و لایەنە پەیوەندیدارەکانی ڕاسپێردران لێپێچینەوە لەگەڵ هەموو ئەو کەس و لایەنانە بکەن کە نرخی خۆراک و پێداویستییەکان لەسەر هاوڵاتییان زیاد دەکەن.

ئەوەی پێویستە بیزانیت: جەخت لە تووندکردنی چاودێریکردنی بازاڕ و نرخەکان کرایەوە، لەپێناو پاراستنی سەلامەتی گیانی هاووڵاتیان، بەدواداچوون و پشکنینی هەموو کۆگا و شوێنەکانی خۆراک و دەرمان بەردەوام دەبێت بۆ دەستبەسەرداگرتنی خۆراک و دەرمانی خراپ و ماوەبەسەرچوو.

بۆچی گرنگە: هەندێک کەس لە کاتی نزیکبوونەوەی ڕەمەزان و بۆنەکاندا هەل دەقۆزنەوە و نرخ لەسەر هاووڵاتییان زیاد دەکەن، بوونی چاودێری وادەکات ڕێگری لەو کارە بکرێت.