کەنەدا سەپاندنی باجی زیادە لەسەر ئەمریکا لادەبات

ئاڤا نیوز

کەنەدا لە هەڕەشەکانی بۆ سەپاندنی باجی زیادە لەسەر سێ ویلایەتی ئەمریکا پاشەکشەی کرد، ئەمەش دوای بڕیاری دۆناڵد ترەمپ، سەرۆکی ئەمریکا بۆ سەپاندنی باجی زیاتر لەسەر بەرهەمی هاوردەکراوی کەنەدا  دێت.

وێنە گەورەکە: شەڕی بازرگانی ئەمریکا و کەنەدا پێی ناوەتەوە قۆناغێکی نوێ و لەبەرامبەردا باجی زیادە لەسەر یەکتر دەسەپێنن، ئەمەش کاریگەری نەرێنی دەکاتە سەر ئابووری هەردوو وڵاتەکە.

ئەوەی پێویستە بیزانیت: لە شەڕێکی ئابووریدا کە  سەرەتا دۆناڵد ترەمپ دەستیپێکرد، لە دوایین هەنگاودا دۆگ فۆرد، سەرۆکوەزیرانی ویلایەتی ئۆنتاریۆی کەنەدا ڕایگەیاند، ئەگەر ترەمپ بەردەوام بێت لە شەڕی بازرگانی، ئەوە بەتەواوەتی پێدانی کارەبا بە ئەمریکا ڕادەگرن، هەروەها ئەگەر پاشەکشە لە کەرتی ئابووری ڕووبدات، تەنیا یەک کەس سەرزەنشت دەکرێت ئەویش دۆناڵد ترەمپە.

ڕاگەیێنراوی فەرمی: لە بەیاننامەیەکی هاوبەشدا لەلایەن دۆگ فۆرد و هاوارد لوتنیک، وەزیری بازرگانیی ئەمریکا، هەردوو سەرکردەکە ڕایانگەیاندووە،

- گفتوگۆیەکی بەرهەمداریان سەبارەت بە پەیوەندییە ئابوورییەکانی نێوان ئەمریکا و کەنەدا ئەنجامداوە.

- ڕۆژی پێنجشەممە لە واشنتنی پایتەختی ئەمریکا کۆدەبنەوە بۆ گفتوگۆکردن لەسەر نوێکردنەوەی ڕێککەوتنی بازرگانی ئەمریکا و مەکسیک و کەنەدا.

- کەنەدا ڕەزامەندی لەسەر ڕاگرتنی سەپاندنی باجی زیادە بە ڕێژەی 25% لەسەر هەناردەکردنی کارەبا بۆ ویلایەتی میشیگان و نیویۆرک و مینیسوتای ئەمریکا دەربڕیووە.

لەلایەکی دیکەوە: پیتەر ناڤارۆ، ڕاوێژکاری بازرگانی ترەمپ ڕایگەیاند، سەپاندنی باجی زیاتر لەسەر هاوردەکردنی مەکسیک و کەنەدا جێبەجێ ناکرێت و بە ڕێژەی 50% باج لەسەر پۆڵا و ئەلەمنیۆمی هاوردەکراو لە کەنەداوە بۆ ئەمریکا ناسەپێنین.

ئەمەش بزانە: دۆناڵد ترەمپ هەڕەشەی دوو هێندەکردنی سەپاندنی باجی لەسەر هاوردەکردنی پۆڵا و ئەلەمنیۆمی کەنەدا کردبوو، ئەمەش بەهۆی بڕیارەکەی ویلایەتی ئۆنتاریۆی کەنەدا بۆ دانانی باج لەسەر هەناردەکردنی کارەبا بۆ ئەمریکا.