ئاڤا بەدواداچوون بۆ گرفتی خانەنشینانی کەرتی تەندروستی سلێمانی دەکات

ئاڤا نیوز

 

خانەنشینانی کەرتی تەندروستی سلێمانی داوا دەکەن هۆکاری ڕاگرتنی مامەلەکانیان بۆ ڕوونبکرێتەوە، وەزارەتی تەندروستیش دەڵێت، "مامەڵەکانیان ڕانەگیراوە'.

 

بابەتی سەرەکی: ئەو فەرمانبەرانەی لە کەرتی تەندروستیی سلێمانی خانەنشین دەکرێن، وەک خۆیان دەڵێن لە 1-1-2025 ئەستۆپاکیان کردووە، بەڵام مامەڵەی خانەنشینیان لەلایەن وەزارەتی تەندروستییەوە ڕاگیراوە و مووچەی مانگەکانی یەک و دووشیان وەرنەگرتووە، داوا لە ئاڤا دەکەن بەدواداچوون بۆ کێشەکەیان بکات.

 

لێدوانی فەرمی: د.مەعاف عەبدوڵڵا، بەڕێوەبەری گشتیی کاروباری کارگێڕی و دارایی لە وەزارەتی تەندروستی بە ئاڤا میدیای ڕاگەیاند: لە 11-2-2025 واژۆمان لەسەر فەرمانی خانەنشینکردن کرد، هەر ئەو کاتە بەڕێوەبەرایەتییەکانی تەندروستیمان ئاگادارکردەوە لیستەکان بنێرن، جگە لەوانەی کەسوکاری شەهید یان ئەنفالن کە نزیکەی 200 کەسن.

 

زانیاریی زیاتر: "لە ڕۆژی 12ـی شوباتی 2025، دوو نووسراومان کرد، یەکەمیان بە ژمارە (3351)  بۆ 570 کەس کە لەدایکبووانی 1962 و 1963 و 1964ـن، دووەمیان بە ژمارە (3350) بۆ 264 کەس کە لەدایکبووی 1965ـن، ئەمانەش بە فەرمانی کارگێڕی لە بەڕێوەبەرایەتی گشتیی تەندروستی سلێمانی بە ژمارە(1447) لە 13ی شوبات دەرچووە".

 

ئەوەی پێویستە بیزانیت: خانەنشینکردنی فەرمانبەرانی کەرتی تەندروستی لە سلێمانی بە قۆناغ دەکرێت، سەرەتاش لەدایکبووانی 1961 دەستپێدەکات، کۆی گشتیی 834 فەرمانبەر لە کەرتی تەندروستی سلێمانی خانەنشین دەبن.