گەڕانەوەی کورد بۆ عەفرین بەشێوەیەکی بەرچاو زیاد دەکات

ئاڤا نیوز

 

دوای ڕێککەوتنەکەی هەسەدە و دیمەشق، خێزانە کوردەکانی عەفرین بۆ شوێنە ڕەسەنەکانی خۆیان دەگەڕێنەوە و گرووپە چەکدارەکانیش ئاستەنگییان بۆ دروست ناکەن.

 

ئەوەی پێویستە بیزانیت: 10ـی ئەم مانگە هەسەدە و ئیدارەی نوێی سووریا لەسەر چەندین دۆسیەی پەیوەست بە کورد ڕێککەوتن، لەناویاندا گەڕانەوەی ئاوارەکان بۆ شوێنی خۆیان بەتایبەت بۆ عەفرین، کە حەوت ساڵە دەیان هەزار هاووڵاتیی کورد لەو شارە ئاوارەبوون.

 

لێدوانی فەرمی: ئەحمەد حەسەن، سەرۆکی ئەنجوومەنی خۆجێیی ئەنەکەسە لە عەفرین بە ئاڤا میدیای ڕاگەیاند، دوای ڕێککەوتنەکەی ئەحمەد شەرع و مەزڵوم عەبدی، خەڵک بەڕێژەیەکی زیاتر بۆ عەفرین و ناحیە و گوندەکانی دەورووبەری دەگەڕێنەوە.

 

زانیاریی زیاتر: "گرووپە چەکدارەکان بۆ گەڕانەوەی هاووڵاتیانی کورد بەراورد بە ڕابردوو، کەمتر ئاستەنگی دروست دەکەن و ئیدارەی نوێی سووریاش بڕیاریداوە دۆخی ئەمنیی لە ناوچەکەدا باشتر بکرێت". ئەحمەد حەسەن وادەڵێت.