سیاسەتمەدارێکی عێراقی: پێشێلکاری لە ناوچە سوونییەکان لە کەناراوەکانی سووریا زیاترە

 

ئاڤا نیوز

سیاسەتمەدارێکی عێراقی چەندین پێشێلکاری گرووپە چەکدارەکانی "بەرەی مقاوەمە" ئاشکرا دەکات و دەڵێت " ئەو پێشێلکارییانەی گرووپە چەکدارەکان لە ناوچە سووننەنشینەکان کردوویانە زۆر لەوانە زیاترە کە لە کەناراوەکانی سووریا ڕوویاندا .

وێنە گەورەکە: لە دوای ڕووخانی ڕژێمەکەی بەشار ئەسەد لە مانگی 12ـی ساڵی ڕابردوو، جارێکی تر شەڕ و ئاڵۆزی ناوخۆیی لە کەناراوەکانی تەرتوس و لازقیە لە نێوان پاشماوەکانی ئەسەد و هێزە ئەمنییەکانی سووریا ڕوویدا، بەگوێرەی ڕوانگەی سووریا بۆ مافەکانی مرۆڤ تاوەکو ئێستا چەندین کۆمەڵکوژی لە پارێزگاکانی تەرتووس، لازقییە و حەما تۆمارکراون.

لێدوانی فەرمی:  مشعان جبووری، سیاسەتمەداری عێراقی و سەرۆکی پارتی وەتەن لە چاوپێکەوتنێکی تەلەڤزیۆنیدا ڕایگەیاند:

٠ گرووپە چەکدارە تایفەگەرییەکان بە بیانووی ڕزگارکردنی ناوچە سووننەنشینەکانی عێراق چەندین کۆمەڵکوژی ترسناکیان لە بیابانی دۆر، عامرییەی فەلوجە، خەتفا و ڕەزازە ئەنجامداوە.

٠ پێشتر لەسەردەمی حەیدەر عەبادی سەرۆکوەزیرانی پێشووتری عێراق لیژنەیەکی لێکۆڵینەوە پێکهێنرا و گەیشتە ئەو ئەنجامەی کە زیاتر لە 1000 هاووڵاتی سڤیل، زۆربەیان لە هۆزی جومەیلە بوون، لەسەر دەستی ئەو گرووپە چەکدارانە لە سێدارەدراون.

٠ تۆماری ڤیدیۆیی لەبەردەستدایە، تێیدا چەندین گەنج لەبیابانەکاندا گوللـەباران دەکرێن و لەهەمان شوێن لەچاڵ دەنرێن،  ئەمەش هاوشێوەی ئەوەیە کە لە کەناراوەکانی سووریا ڕوویدا .