ئەمریکا سزا بەسەر چەند کەس و کۆمپانیایەکی حەشدی شەعبی دەسەپێنێت

ئاڤا نیوز

 

ئۆفیسی کۆنترۆڵی داراییە بیانییەکانی سەر بە وەزارەتی گەنجینەی ئەمریکا ڕێکاری نوێ بەسەر ئەو کەس و کۆمپانیایانەدا دەسەپێنێت کە یارمەتیی ئێرانیان داوە لە خۆدزینەوەی سزاکان، بە قاچاخبردنی چەک، بەشداربوون لە گەندەڵیی بەرفراوان لە عێراق؛ لەوانەش میلیشیا عێراقییەکانی وەک کەتائیبی حیزبوڵڵا کە لەلایەن ئەمریکاوە لە لیستی ڕێکخراوە تیرۆریستییە بیانییەکان دانراون.

 

ڕاگەیێنراوی فەرمی: بەگوێرەی ڕاگەیێنراوەکەی گەنجینەی ئەمریکا ئەم گرووپانە بەرپرسیارن لەو هیرشانەی کە کراون و بوونەتە هۆی مردنی کارمەندانی ئەمریکا و هەروەها هێرشیش دەکەنە سەر بەرژەوەندییەکانی ئەمریکا و هاوپەیمانان لە ڕۆژهەڵاتی ناوەڕاست. 

- میلیشیاکان لە قازانجی ئێران گەندەڵی دەکەن و پارە سپی دەکەنەوە و پشتیوانی بۆ گرووپە میلیشیاکانی عێراق دابین دەکەن.
-  گەنجینە هەروەها ڕێکار لە دژی سوپای پاسداران ئێران دەگرێتە بەر کە هاوکاریی چالاکییەکانی تۆڕێکی سەرچاوەکانی کۆکردنەوەی زانیاریی دەکات کە زانیاری لەسەر هێزەکانی ئەمریکاش کۆ دەکەنەوە.
- بڕینی سەرچاوەی دارایی ئەم گرووپانە دەبێتە هۆی پاراستنی گیانی ئەمریکییەکان و پاراستنی ئاسایشی نیشتیمانیی ئەمریکا.

 

زانیاریی زیاتر: یەکێک لەو کۆمپانیایانەی کە سزا دراوە 'کۆمپانیای گشتیی موهەندیس'ـە کە لەلایەن کەتائیبی حیزبوڵڵاوە دامەزراوە، بازرگانییەکی فراوانی لە بوارەکانی بیناسازی، ئەندازیاری، میکانیکی، کشتوکاڵی و پیشەسازیدا هەیە و پشتیوانیی هێزەکانی حەشدی شەعبی و ئێران دەکات.

 

ئەمەش بزانە: گەنجینەی ئەمریکا ڕایدەگەیێنێت کە ئێران سوود لە ئابووریی عێراق وەردەگرێت و لە ڕێگەیەوە خۆی لە سزاکان دەدزێتەوە؛ هەر بۆیە سێ بەرپرسی بانکیی عێراقی سزا دەدات کە لە ڕێگەی سپیکردنەوەی پارەوە کار بۆ بەرژەوەندیی فەیلەقی قودسی سوپای پاسداران، کەتائیبی حیبزوڵڵا و عەسائیبی ئەهلی حەق دەکەن؛ ئەوانیش بریتین لە هەر یەکە لە: عەلی غوڵام، عەلی مەفتەن و عەقیل مەفتەن.