وەزارەتی دەرەوەی عێراق پێشوازی لە ڕێککەوتنی غەززە دەکات

ئاڤا نیوز

وەزارەتی دەرەوەی عێراق پێشوازی لە ڕێککەوتنی ئاگربەست لە کەرتی غەززە دەکات و داوای دامەزراندنی دەوڵەتێکی سەربەخۆ بۆ فەڵەستین دەکات، بەجۆرێک پایتەختەکەی قودس بێت.

وێنە گەورەکە: دوای 734 ڕۆژ لەبەردەوامبوونی هێرشی ئیسرائیل بۆ سەر کەرتی غەززە، دواجار بەرەبەیانی ڕۆژی پێنجشەممە 9-10-2025  دۆناڵد ترەمپ، سەرۆکی ئەمریکا ڕێککەوتنی کۆتاییهێنانی جەنگی نێوان ئیسرائیل و حەماس لەو کەرتە ڕاگەیاند، ڕێککەوتنەکەش بریتییە لە ڕاگەیاندنی ئاگربەست، کشانەوەی هێزەکانی ئیسرائیل، گەیاندنی یارمەتیی مرۆیی و ئاڵوگۆڕی دیلەکانی نێوان هەردوولا.

ڕاگەیێنراوی فەرمی: وەزارەتی دەرەوەی عێراق لە بەیاننامەیەکدا ڕایگەیاند: عێراق پێشوازی لە ڕێککەوتنی ئاگربەست لە غەززە دەکات و پشتیوانی خۆی بۆ هەموو ئەو هەوڵانە دەکات کە ئامانجیان ڕاگرتنی جەنگ، کەمکردنەوەی نەهامەتی هاووڵاتیانی مەدەنی و سەقامگیری ناوچەکەیە.

زانیاریی زیاتر:  وەزارەتی دەرەوەی عێراق داوای پاراستنی مافی ڕەوای گەلی فەڵەستین لە چوارچێوەی بڕیارەکانی یاسای نێودەوڵەتی بۆ گەیشتن بە دامەزراندنی دەوڵەتی فەڵەستین بە پایتەختی قودسەوە دەکات.