عێراق لە ژمارەی دارخورمادا یەکەمی جیهانە؛ کام جۆری خورمای بەناوبانگترینە؟

ئاڤا نیوز

لە مانگی ڕەمەزاندا خواستی هاووڵاتیان بۆ خورما بەشێوەیەکی بەرچاو زیاد دەکات، عێراقیش لە ئاستی جیهاندا زۆرترین ژمارەی دارخورمای هەیە و ساڵانە زیاتر لە 700 هەزار تۆنی لێ هەناردە دەکات.

وێنە گەورەکە: هەرچەندە عێراق یەکەمی جیهانە لە ژمارەی دارخورمادا، بەڵام لە بەرهەمهێنانی خورمادا دوای هەریەکە لە میسر، سعودیە و جەزائیر پلەی چوارەمی گرتووە.

لێدوانی فەرمی: میساق عەبدولحوسێن، بریکاری هونەری وەزارەتی کشتووکاڵی عێراق ڕایگەیاند، ئێستا لە وڵاتدا زیاتر لە 22 ملیۆن دارخورما هەیە و پلانیش هەیە لە ساڵانی داهاتوودا ژمارەکە بۆ 30 ملیۆن دارخورما زیاد بکرێت.

ژمارەکان وا دەڵێن: ڕێزبەندی وڵاتانی جیهان لە ڕووی بوونی ژمارەی دارخورماوە بەم شێوازەیە: عێراق پلەی یەکەمە و 22 ملیۆن دارخورمای هەیە، ئێران 21 ملیۆن، سعودییە 12 ملیۆن، جەزائیر 9 ملیۆن، میسر و لیبیا هەر کامێکیان حەوت ملیۆن.

زانیاریی زیاتر: عێراق ساڵی ڕابردوو زیاتر لە 800 هەزار تۆن خورمای بەرهەمهێناوە، لەو ژمارەیەش 700 هەزار تۆنی لێ هەناردە کردووە، خورمای برێم و بەرحی و قەرنفلیش سێ ناسراوترین جۆری خورمای عێراقیین و لە بازارەکانی هەرێمی کوردستانیش خواستێکی زۆریان لەسەرە.