بەریتانیا: ڕووسیا بە هێرشە وەحشیگەرییەکانی هەوڵ دەدات ئاگربەست دوابخات

ئاڤا نیوز

سەرۆکوەزیرانی بەریتانیا ،ڕووسیا تۆمەتبار دەکات بە هەوڵدان بۆ دواخستنی ئاگربەست و بەدیهێنانی ئامانجە سەربازییەکانی.

وێنە گەورەکە: دوای ڕازیبوونی ئۆکراینا بە ڕاگەیاندنی ئاگربەستی 30 ڕۆژە، ڕووسیا بە مەرج ئامادەی ڕازیبوونە بە ئاگربەست و لیستی داواکارییەکانی ڕادەستی واشنتن کردووە، کەیر ستارمەر، سەرۆکوەزیرانی بەریتانیا، ئەمڕۆ شەممە بۆ چڕکردنەوەی هەوڵەکان بۆ ڕاگەیاندنی ئاگربەست، بە شێوەی ئۆنلاین لەگەڵ سەرۆک و بەرپرسانی 25 ولاتی پشتیوانی ئۆکراینا کۆبوونەوەیەکی ئەنجامدا.

لێدوانی فەرمی: ئێوارەی ئەمڕۆ شەممە کەیر ستارمەر لە کۆبوونەوەی سەرۆکەکانی پشتیوان لە ئۆکراینا ڕایگەیاند:

- سەرەڕای پێشنیازی سەرۆک ترەمپ، ڕووسیا بەردەوامە لە هێرشە وەحشیگەرییەکانی و هەوڵ دەدات ڕاگەیاندنی ئاگربەست دوابخات و ئامانجە سەربازیەکانی بەدی بێنێت.

- زوو یان درەنگ پووتین دێتە سەر مێزی گفووگۆ، بۆ نیشاندانی نیازپاکی کریملن سەبارەت بە ئاشتی دەبێت واژۆ لەسەر ئاگربەستی کاتی بکات.