عێراق دەستبەسەرداگرتنی 1100 کیلۆگرام ماددەی هۆشبەر ڕادەگەیێنێت

ئاڤا نیوز

لە عێراق بە هاوکاری بەڕێوەبەرایەتی نەهێشتنی ماددەی هۆشبەر، دەستبەسەر بارهەڵگرێدا دەگیرێت کە بڕی یەک تۆن و 100 کیلۆگرام ماددەی هۆشبەری پێ بووە و لە سووریاوە لەڕێگەی تورکیاوە هاتۆتە ناو خاکی عێراق.

چیرۆکی سەرەکی: وەزارەتی ناوخۆی عێراق، بەهاوکاریی بەڕێوەبەرایەتیی نەهێشتنی ماددە هۆشبەرەکانی هەرێمی کوردستان، دەستیانبەسەر بارهەڵگرێکدا گرتووە کە لە سووریاوە بە خاکی تورکیادا هاتووەتە عێراق و 1100 کیلۆگرام ماددەی هۆشبەری پێ بووە.

لێدوانی فەرمی: عەمید میقداد میری، وتەبێژی وەزارەتی ناوخۆی عێراق ڕایگەیاند، لە بەڕێوەبەرایەتی ماددە هۆشبەرەکانی سعوودیەوە زانیارییان پێگەیشت لەسەر بارهەڵگرێک کە ماددەی هۆشبەری تێدایە، لەسەر بڕیاری دادگای ڕەسافە و بەهاوکاری بەڕێوەبەرایەتی نەهێشتنی ماددە هۆشبەرەکان لە هەولێر و سلێمانی، دەستیان بەسەر بارهەڵگرەکەدا گرت.

ئاماژەی بەوەشكرد، بارهەڵگرەکە لە سووریاوە بە خاکی تورکیادا هاتووەتە عێراق و تۆنێک و 100 کیلۆگرام حەبی کاپتاگۆنی پێ بووە، لە پاڵ دەستبەسەرداگرتنی ئەو بڕە زۆرەی ماددەی هۆشبەر، ئەوانەشی تێوەگلاون دەستگیرکران و تۆڕەکەیان هەڵوەشێنرایەوە.

ئەوەی پێویستە بیزانیت: ساڵی ڕابردوو لە عێراق 14 هەزار کەس بەتۆمەتی پەیوەست بە ماددەی هۆشبەر دەستگیرکراون، دەستیش بەسەر زیاتر لە شەش تۆن ماددەی هۆشبەردا گیراوە.