ترەمپ: لەگەڵ سەرۆک پووتین هەواڵی دڵخۆشکەر بۆ جیهان ڕادەگەیەنین

ئاڤا نیوز

 

دۆناڵد ترەمپ، سەرۆکی ئەمریکا باس لە ڕاگەیاندنی هەواڵی دڵخۆشکەر و گرنگ بۆ جیهان دەکات دوای ئەوەی پلانی گفتوگۆیەکی تایبەتی لەگەڵ ڤلادیمێر پووتین، سەرۆکی ڕووسیا بۆ کەناڵەکانی ڕاگەیاندن ئاشکرا کرد.

 

وێنە گەورەکە: لە چوارچێوەی بەردەوامی هەوڵەکانی دۆناڵد ترەمپ، سەرۆکی ئەمریکا بۆ گەشتن بە ڕێککەوتنی ئاشتی و ڕاگەیاندنی ئاگربەست لە نێوان ڕووسیا و ئۆکراینا، لە کاتی گەڕانەوەی لە فلۆریداوە بۆ واشنتن لە نێو فڕۆکەی سەرۆکایەتی قسەی بۆ ڕۆژنامەنووسان کرد و پێی ڕاگەیاندن دەرفەتی گەورە هاتۆتە پێش بۆ کۆتایهێنان بە جەنگی نێوان ڕووسیا و ئۆکراینا.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: " بەرنامەی گفتوگۆ ڕۆژی سێشەممە لەگەڵ سەرۆک پووتین بابەتی زۆر گرنگی پەیوەست بە خاک و سەرچاوەی وزەی نێوان ڕووسیا و ئۆکراینا لەخۆدەگرێت، تاوەکو ئێستا هەنگاوی زۆر باشمان ناوە و کاری گرنگمان ئەنجامداوە."  

 

دۆناڵد ترەمپ وتیشی: دەرفەتی زۆر باش و گەورەمان هەیە بۆ ڕاگرتن و کۆتایهێنان بە جەنگی نێوان ئۆکراینا و رووسیا و دوای قسەکردنم لەگەڵ سەرۆک پووتین هەواڵی دڵخۆشکەر و گرنگ بۆ جیهان ڕادەگەیەنین.