وەزیری پێشمەرگە ستایشی ڕۆڵی ئەڵمانیا دەكات لە پرۆسەی چاكسازیی وەزارەتەكە

ئاڤا نیوز

 

وەزیری پێشمەرگە ستایشی ڕۆڵی فەرماندەیی هێزەكانی ئەڵمانیا دەكات لە بەرەوپێشچوونی پرۆسەی چاكسازیی لە وەزارەتەكە و یەكخستنەوەی هێزەكانی پێشمەرگە.

 

وێنە گەورەكە: ئەمڕۆ 18-3-2025، شۆڕش ئیسماعیل، وەزیری پێشمەرگەی هەرێمی کوردستان، بەئامادەبوونی عەبدولخالق باپیری، بریكاری وەزارەت، پێشوازی لە کۆڵۆنێڵ تۆماس ڕیتەر، فەرماندەی هێزەکانی ئەڵمانیا لە هەرێمی کوردستان کرد، كه‌ بە بۆنەی کۆتاییهاتنی ئەرکەکەی لە هەرێمی کوردستان، سه‌ردانى وه‌زاره‌تى كردبوو.

 

لێدوانی فەرمی: شۆڕش ئيسماعيل، ستایشی ڕۆڵی گرنگی فەرماندەی هێزەکانی ئەڵمانیاى لە هەرێمی کوردستان کرد كە لە ماوەی ئەرکەکەیدا، دڵسۆزانە بەردەوام پاڵپشت و هەماهەنگ بووە لە بەرەوپێشچوونی پرۆسەی چاکسازیی لەنێو وەزارەتى پێشمه‌رگه‌.

 

لەلایەكی دیكەوە: وەزیری پێشمەرگە پیرۆزبایی لە کۆڵۆنێڵ کووپەر کرد كه‌ وەک فەرماندەی نوێی هێزەکانی ئەڵمانیا لە هەرێمی کوردستان دەست بەکار دەبێت. لەمبارەیەوە وەزیری پێشمەرگە دڵنیایی دا لەوەی لـە ماوەی ئەرکەکەیدا، پەیوەندییەکان و هەماهەنگيی نێوانیان زیاتر و فراوانتر دەبێت.

 

بۆچوونی لایەنی بەرامبەر: کۆڵۆنێڵ تۆماس ڕیتەر، فه‌رمانده‌‌ى پێشووى هێزه‌كانى ئه‌ڵمانيا ڕایگەیاند: "لەماوەی ئەرکەکەمدا توانیومانە لەگەڵ وەزارەتی پێشمەرگە کاری زۆرباش بۆ سەرخستنی پرسی چاکسازی لە وەزارەتی پێشمەرگە بكه‌ين، بەردەواميی پەیوەندییەکان و پاڵپشتی و پشتیووانيی ئەڵمانیای بۆ وەزارەتی پێشمەرگە دووپات کردەوە."