سبەی ئەنجوومەنی وەزیرانی هەرێمی کوردستان کۆدەبێتەوە و گفتوگۆ لەسەر سێ بڕگە دەکرێت

ئاڤا نیوز

 

سبەی ئەنجوومەنی وەزیرانی هەرێمی کوردستان کۆدەبێتەوە و گفتوگۆ لەبارەی سێ بڕگە دەکرێت کە یەکێکیان دامەزراندنی دەرچووانی کۆلیژی پزیشکیی گشتیی زانکۆ حکومییەکانە بۆ ساڵی 2024.

 

وێنە گەورەکە: سبەی چوارشەممە کاتژمێر 11ـی پێشنیوەڕۆ، ڕێککەوتی 19ـی 3ـی 2025 ئەنجوومەنی وەزیرانی هەرێمی کوردستان کۆبوونەوەی ئاسایی خۆی دەکات و بەپێی كارنامەی كۆبوونەوەکە، بە سێ بڕگە گفتۆگۆ لەسەر بابەتی درێژکردنەوەی لێخۆشبوونی سەدا 20ـێ سزای هاتووچۆ و کێشەی مووچە و دامەزراندنی چەند توێژێک دەکرێت.

 
زانیاریی بەدەستهاتوو: یەکێک لەو بڕگانەی گفتوگۆی لەبارەوە دەکرێت پێشنیازێکی وەزارەتی ناوخۆیە  بۆ درێژکردنەوەی کارکردن بە بڕیاری پێشووی ئەنجوومەنی وەزیرانی تایبەت بە داشکاندنی ڕێژەی 20%ـی سزای سەرپێچیی هاتووچۆ بۆ ماوەی شەش مانگی دیکە لە 1-1-2025 تاوەکو 30-06-2025 .

 

ئەوەی پێویستە بیزانیت: بڕگەی دووەم یەکلاییکردنەوەی کێشەی ئەوانەیە کە لەسەر میلاکی دامەزراوەکانی حکومەتی هەرێمی کوردستان بە هەمیشەیی و گرێبەست دامەزراون، بەڵام لە ڕێکەوتی 01-07-2024ـەوە مووچەیان بۆ نەبەستراوە لەلایەن وەزارەتی دارایی و ئابووری بەهۆی جێگیرکردنی میلاکی مانگی تەممووز لەلایەن وەزارەتی دارایی فیدراڵەوە.

 

زانیاریی زیاتر: هاوکات بابەتی پێشنیازی وەزارەتی تەندروستی لەبارەی دامەزراندنی دەرچووانی کۆلێژی پزیشکیی گشتیی زانکۆ حکومییەکان بۆ ساڵی 2024، بڕگەی سێیەمی گفتوگۆکانی کۆبوونەوەی سبەی ئەنجوومەنی وەزیرانە.